„ქართული ოცნების“ აღმასრულებელი მდივანი, დეპუტატი ირაკლი კობახიძე აცხადებს, რომ „კარგია“ უკრაინიდან წამოსული „დადებითი ინფორმაცია“, რომ სააკაშვილი „ვიცე-პრემიერად უკვე აღარ განიხილება“, თუმცა მიიჩნევს, რომ საქართველოს ყოფილი პრეზიდენტის უკრაინაში ნებისმიერ საჯარო თანამდებობაზე დანიშვნა პრინციპულად მიუღებელია.

„კარგია, რომ პირველი ინფორმაცია, რომელიც სააკაშვილის დანიშვნასთან დაკავშირებით წამოვიდა, არის დადებითი. კერძოდ, იმ განცხადებებს ვგულისხმობთ, რომელიც გააკეთეს პარლამენტის თავმჯდომარემ, რომელიც აცხადებს, რომ ის სავარაუდოდ არ დაუჭერს მხარს სააკაშვილის თანამდებობაზე დანიშვნას. ასევე იყო ინფორმაცია, რომ ის ვიცე-პრემიერად უკვე აღარ განიხილება, თუმცა ჩვენთვის პრინციპულად მიუღებელია ნებისმიერ საჯარო თანამდებობაზე სააკაშვილის დანიშვნა. ეს აღიქმება, როგორც არამეგობრული ნაბიჯი და დიდი იმედი გვაქვს, საქმე აქამდე არ მივა“, – განაცხადა ირაკლი კობახიძემ.

მან თქვა, რომ სააკაშვილის შესაძლო დანიშვნასთან დაკავშირებით საქართველოს ხელისუფლების მხრიდან „უკრაინის ხელისუფლებიდან კოლეგებთან და მეგობრებთან კომუნიკაცია შედგა“.