საქართველოს პარლამენტის თავმჯდომარე დავით უსუფაშვილი მიიჩნევს, რომ დედაქალაქის ყოფილი მერი გიგი უგულავა ისეთივე უდანაშაულოა, ან ისეთივე დამნაშავეა, როგორიც გუშინწინ იყო. ამის შესახებ დავით უსუფაშვილმა ბიუროს დღევანდელ სხდომაზე, გიგი უგულავასთან დაკავშირებით, საკონსტიტუციო სასამართლოს გადაწყვეტილებაზე საუბრისას განაცხადა. მისი თქმით, საკონსტიტუციო სასამართლოს არ უმსჯელია ვინმეს ბრალეულობაზე და ავკარგიანობაზე.

 
,,საკონსტიტუციო სასამართლომ კანონის კონსტიტუციონირებასთან დაკავშირებით შეტანილ დავაზე იმსჯელა, კანონისა, რომელიც წინა მოწვევის პარლამენტებმა მიიღეს, "ნაციონალური მოძრაობის" ხელისუფლებაში ყოფნის დროს. ამ კანონების გარკვეულ მუხლებზე ითქვა, რომ ეს არ არის კონსტიტუციური. ამ კანონების შეცვლასთან დაკავშირებით, პარლამენტში არანაირი ინიციატივა არ შემოსულა არც წინა მოწვევის დროს და არც ახლა. მოპასუხე სასამართლოში იყო პარლამენტი და ვინაიდან, დღემდე არსებული პარლამენტების სამართალმემკვიდრე ვართ, მოქმედ კანონმდებლობაზე პასუხისმგებელი ჩვენ ვართ. საკონსტიტუციო სასამართლო კანონის კონსტიტუციურობაზე მსჯელობს და შემდგომ სათანადო გადაწყვეტილებას დანარჩენი სახელმწიფო სტრუქტურები იღებენ. პარლამენტში ამ თემაზე მუშაობა მოგვიწევს, მას შემდეგ რაც საკონსტიტუციო სასამართლოს გადაწყვეტილებას ვნახავთ. ჩემი მცდელობის მიუხედავად, საქართველოს პარლამენტს, მთავარ მოპასუხეს, ჯერ კიდევ არა აქვს სრული გადაწყვეტილება სასამართლოსი", - აღნიშნა პარლამენტის თავმჯდომარემ.


უსუფაშვილის განცხადებით, პარლამენტი საკონსტიტუციო სასამართლოს სამოტივაციო ნაწილს სავარაუდოდ დღეს მიიღებს.

 
პარლამენტის თავმჯდომარე მიიჩნევს, რომ ეს სასამართლოს საქმიანობაში კიდევ ერთი ხარვეზია.

"გადაწყვეტილება სრული სახით ჯერ კიდევ არ არის და ეს ძალიან ცუდია. ვიცი, რომ სასამართლოში არის პრაქტიკა, როცა სარეზოლუციო ნაწილი ცხადდება, მაგრამ ისიც ვიცი, რომ ეს არის მაშინ, როდესაც ვადებში შეზღუდვაა, სარეზოლუციო ნაწილი ცხადდება და სამოტვაციო ნაწილი დაეწევა ხოლმე. მაისის ბოლოს ასეთივე შემთხვევა მახსენდება, როდესაც საარჩევნო სისტემასთან დაკავშირებულ საკითხებზე სასამართლო წელიწადნახევარი სათათბირო ოთახში იყო და თემაზე მსჯელობდა, მერე კი, უცებ სარეზოლუციო ნაწილი გამოცხადდა და სამოტივაციო ძირითადი ნაწილი დაახლოებით ერთი კვირის დაგვიანებით გამოცხადდა. წელიწადნახევარში შეიძლებოდა სრულ ტექტსზე მუშაობა დასრულებულიყო და ეს ყველაფერი გამოცხადებულიყო. მინდა ყურადღება მივაქციო, რომ მაშინაც რაღაც გარკვეული მოვლენა ახლოვდებოდა და ეჭვი გაჩნდა, რომ იმ მოვლენამ გადაწყვეტილების მიღება ხომ არ დააჩქარა?! დაახლეობით ისეთ ვითარებასთან გვაქვს საქმე დღესაც", -განაცხადა უსუფაშვილმა.


პარლამენტის თავმჯდომარემ ბიუროს სხდომაზე მოსამართლეების პასუხისმგებლობაზეც ისაუბრა.

"ვისურვებ, რომ მსგავსი ამბები არ განმეორდება და მოსამართლეები ამის საბაბს არ მოგვცემენ. ჩვენ საკონსტიტუციო სასამართლო კონსტიტუციით შექმნილი იმიტომ გვყავს, რომ საქართველოს პარლამენტს მეთვალყურეობა გაუწიოს, რათა კონსტიტუციის შესაძლო დამრღვევები ჩვენ ვართ. კონსტიტუციურად შექმნილია ის სისტემა, როდესაც პარლამენტი შეიძლებოდა არასწორი გამოჩნდეს. ამიტომ ამასთან დაკავშირებით მტკივნეული განცდები არ უნდა გვქონდეს. ეს ჩვეულებრივი ნორმალური პროცესია, როგორიც არის სხვა შემთხვევები, მაგრამ ამ თანამდებ მოვლენებს მეტი ყურადღება უნდა მივაქციოთ, რომ გაწყეტილებებს სათანადო ნდობა და ავტორიტეტი ჰქონდეს. ამოსაბაში რა მოხდა? იმ მუხლის გაუქმება მოხდა, რომელმაც გარკვეულ შემთხვევებში, წინასწარი პატიმრობის შესაძლო ვადა შეამცირა, რაც თავისთავად დემოკრატიული ნაბიჯია. ეს იმ ხაზის გაგრძელებაა, რომელზეც დიდი ხანია ეს ქვეყანა მუშაობს. მათ შორის, ჩვენი პარლამენტი. წინასწარ პატიმრობასთან დაკავშირებით მნიშვნელოვანი ინოვაციები შემოვიღეთ, როდესაც სტანდარტი ავწიეთ. დღეს განცხადებები მესმის, რომ ამის გამო სახეზეა პროკურატურის კოლაფსი. უკაცრავად მეგობრებო, პროკურატურა მოქმედებდა და მოქმედებს მოქმედი კანონის შესაბამისად", - აღნიშნა უსუფაშვილმა.