საქართველოს განათლების, მეცნიერების, კულტურისა და სპორტის სამინისტროს გადაწყვეტილებით, კორონავირუსის გავრცელების პრევენციის მიზნით, ქვეყანაში შექმნილი ვითარების გათვალისწინებითა და ბენეფიციართა ინტერესებიდან გამომდინარე, „კულტურის ხელშეწყობის პროგრამის“ ფარგლებში გამოცხადებულ კონკურსებზე, განაცხადების მიღების დასრულების ვადად განისაზღვრა 2020 წლის 1 ივნისის 18:00 საათი; ხოლო კონკურსების ფარგლებში გამარჯვებული პროექტების დაწყების თარიღად - 2020 წლის 15 ივლისი.

იმ პირებს, რომლებსაც უკვე შემოტანილი აქვთ საკონკურსო განაცხადები, შესაძლებლობა ეძლევათ, 2020 წლის 1 ივნისამდე წარმოადგინონ  ახალი საკონკურსო განაცხადი  ან დაზუსტებული განაცხადი შესაბამისი ფორმით.

1 ივნისის ჩათვლით მსურველებს „კულტურის ხელშეწყობის პროგრამით“ გამოცხადებული კონკურსების ფარგლებში საკონკურსო განაცხადებისა და სხვა საკონკურსო დოკუმენტაციის გაგზავნა შეუძლიათ ელექტრონულად, მისამართზე: culturesupport@mes.gov.ge;

იხილეთ კონკურსების ჩამონათვალი:

1. „ახალი ქართული წიგნი“ – საგამომცემლო სექტორის ხელშეწყობა;
2. პროფესიული თეატრების შემოქმედებითი საქმიანობის ხელშეწყობა;
3. თანამედროვე სახვითი ხელოვნების ხელშეწყობა და პოპულარიზაცია თბილისსა და რეგიონებში;
4. სახვითი ხელოვნების სფეროში წიგნი-ალბომების გამოცემის ხელშეწყობა;
5. „ხელოვნება განათლებისთვის" მცირე გრანტები სახელოვნებო განათლებაში;
6. ეთნიკურ უმცირესობათა თვითმყოფადობის შენარჩუნების მიზნით შემოქმედებითი საქმიანობის ხელშეწყობა;
7. „უსაზღვრო შესაძლებლობები "- კულტურულ ღონისძიებებში შშმ პირთა მონაწილეობა;
8. მაღალმთიანი რეგიონებისთვის კულტურული ცხოვრების ხელმისაწვდომობა;
9. „ხელოვნება გამყოფი ხაზების გარეშე" - დევნილთა კომპაქტურ დასახლებებში და რეგიონებში სახელოვნებო განათლების ხელმისაწვდომობა.

საკონკურსო განაცხადების განხილვისას, კომისია იხელმძღვანელებს ქვეყანაში არსებული ეპიდემიოლოგიური მდგომარეობით, ასევე ჯანდაცვის მსოფლიო ორგანიზაციის, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროსა და დაავადებათა კონტროლისა და საზოგადოებრივი ჯანმრთელობის ეროვნული ცენტრის რეკომენდაციებით.

საკონკურსო კომისიის მიერ უპირატესობა მიენიჭება იმ პროექტებს, რომელებიც პასუხობენ პანდემიასთან დაკავშირებით საქართველოში და ზოგადად მსოფლიოში შექმნილ ვითარებასა და დადგენილ შეზღუდვებს და ითვალისწინებენ ინოვაციურ მიდგომებს (მათ შორის ცალკეული პროექტების დისტანციური საშუალებებით განხორცილების შესაძლებლობას, ციფრული ტექნოლოგიების გამოყენებას და სხვ.).