ბიძინა ივანიშვილმა მითხრა, ეს თქვენი გადაწყვეტილება არისო,- განაცხადა სალომე ზურაბიშვილმა „ღამის კურიერისთვის" მიცემულ ინტერვიუში გიგი უგულავას და ირაკლი ოქრუაშვილის შეწყალების შესახებ კომენტირებისას.  

საქართველოს პრეზიდენტის თქმით, მას ამ საკითხზე ივანიშვილთან არ უმსჯელია და პარტია „ქართული ოცნების“ თავმჯდომარეს მხოლოდ თავისი გადაწყვეტილების შესახებ აცნობა.

„მე კითხვის ფორმით კი არ მივმართე, მინდოდა, რომ ეს გადაწყვეტილება ცნობილი ყოფილიყო, იმიტომ, რომ ეს არის ქვეყნის ნორმალური მართვის ფორმა. არ შეიძლება, რომ უცებ, სიურპრიზები შეაგდო, ყველანი უნდა იყვნენ გაფრთხილებულნი. მითხრა, ეს თქვენი გადაწყვეტილება არისო, როგორც, სხვათა შორის, მითხრა პირველივე დღიდან, როცა ამირჩიეს და როცა შევხვდით ამის მერე: რომ იცოდეთ, თქვენ კი დაგეხმარეთ ყველანაირად, იცით, „ოცნების“ დახმარებით ამირჩიეს, მაგრამ ეს არის თქვენი პრეზიდენტობა, დამოუკიდებელი და ნეიტრალური, როგორც კონსტიტუცია მოითხოვს და იცოდეთ, რომ თქვენ იქნებით დამოუკიდებელი თქვენს გადაწყვეტილებებში“, - განაცხადა სალომე ზურაბიშვილმა.