საქართველოს ყოფილმა პრეზიდენტმა, მიხეილ სააკაშვილმა თავისი ხელისუფლების ერთ-ერთი გავლენიანი პირი, უშიშროების საბჭოს მდივანი გიგა ბოკერია 2019 წელს „მთავარი არხის“ ეთერში ქართული ტრადიციების და ქრისტიანობის მოწინააღმდეგედ მოიხსენია და თქვა, რომ ბოკერიას „განსაკუთრებულად ცინიკური დამოკიდებულება აქვს ქართული ტრადიციების და ქართული ტრადიციული ფასეულობების მიმართ“.

„რაც შეეხება ბატონ ბოკერიას, აქ არის მართლაც ფუნდამენტური განსხვავება. მე ჩემი შეხედულებებით, ჩემი მრწამსით ვარ მართლმადიდებელი ქრისტიანი, მიუხედავად იმისა, ვინც რა უნდა თქვას, ეს ასეა. ვატარებ ჯვარს. ბოკერიამ ყველაფერი გააკეთა იმისათვის, რომ ჩვენი დისტანცირება მომხდარიყო ჩვენი ტრადიციული ქართული ქრისტიანული ფასეულობებიდან. მას მთელი ეს წლები, განსაკუთრებულად ცინიკური დამოკიდებულება აქვს ქართული ტრადიციების მიმართ, ქართული ტრადიციული ფასეულობების მიმართ - ფასეულობები, რომელიც ჩემთვის არის უძვირფასესი და რომელიც ქართველი ხალხისთვის არის ყოველდღიური ცხოვრების წესი“, თქვა სააკაშვილმა და აღიარა, რომ მისი ხელისუფლების დროს ბოკერიას მეშვეობით, „ბევრი უბედურება“ მოხდა.

„ბოკერია არის პრინციპში ყევლაფერი რაც არის ქართული, იმ ტრადიციების წინააღმდეგ, ქრისტიანულის... ჩემ წინააღმდეგ ვერ გამოიყენებენ ამას იმიტომ, რომ 600 ეკლესია მაქვს აშენებული ჩემი ინიციატივით, მათ შორის ბაგრატი“, აღნიშნა სააკაშვილმა და ბოკერიაზე საუბრისას დასძინა: „შეცდომა ვის არ აქვს დაშვებული“.

მიუხედავად ბოკერიასადმი კრიტიკული დამოკიდებულების გამჟღავნებისა, სააკაშვილმა თქვა, რომ „ევროპულ საქართველოში“ ბევრი კარგი ლიდერია და „უკიდურესად დასუსტებული და უკიდურესად რეაქტიული“ ივანიშვილის რეჟიმის დასამარცხებლად მათთან და ბოკერიასთან თანამშრომლობასაც აპირებს.