(GUARDIAN.GE) - „მე არ მინდა ბლოკი გიგა ბოკერიასთან და არ მინდა ერთობა შალვა ნათელაშვილთან იმიტომ, რომ ეს არ არის ერთობა. ეს არის მოჩვენებითი ერთობა“, განაცხადა „ერთიანი ნაციონალური მოძრაობის“ პოლიტიკური საბჭოს თავმჯდომარემ, ნიკა მელიამ პარასკევს, ტელეკომპანია „კავკასიას“ ეთერში, გადაცემა „სპექტრში“ სტუმრობისას.

„როგორც სამგორისა და გლდანის რაიონებში, დედაქალაქის გარეთაც ვიწყებთ აქტიურ მუშაობას და მე იმედი მაქვს, რომ ოპოზიციური დანარჩენი ჩვენი მეგობარი კოლეგები და პარტიები მალევე გადაწყვეტენ საკითხებს, რომელიც გადასწყვეტია ერთმანეთს შორის და შემოგვიერთდებიან და ჩადგებიან იმ ფერხულში, რასაც ჰქვია ხალხის ინტერესების გატარება ანუ კამპანიაში ისინიც ჩაერთვებიან და 20 ივნისისთვის, მე იმედი მაქვს, მოხერხდება თბილისში 8 ძლიერი მაჟორიტარული კანდიდატის წარდგენა, რაც იქნება უკვე ნახევარი საქმე გაკეთებული ბიძინა ივანიშვილის დასამარცხებლად, როგორც ოლიგარქს ვგულისხმობ. ბიძინა ივანიშვილი ოლიგარქია, ანტისახელმწიფოებრივი ელემენტია და არის დასამარცხებელი. ოლიგარქია და სახელმწიფო ერთად ვერ ფუნქციონირებს“, განაცხადა მელიამ.

მან აღნიშნა, რომ დღეს გაერთიანებულ ოპოზიციაში „მოჩვენებითი ერთობა“ სუფევს, მაგრამ თუკი „რეალურ ერთობას“ ექნება ადგილი, მაჟორიტარულ ოლქებში „ძალიან ბევრ პირველ ტურს“ მოიგებენ და „პირველ ტურში ოპოზიციური ჯამური ხმები მნიშვნელოვნად მეტი იქნება, ვიდრე „ქართული ოცნების“.

„მე არ მინდა ბატონო ჩემო ბლოკი გიგა ბოკერიასთან ანუ მე არ მინდა ერთობა მხოლოდ „ევროპულ საქართველოსთან“ და არ მინდა ერთობა ბატონ შალვა ნათელაშვილთან, რომელსაც ძალიან დიდ პატივს ვცემ, იმიტომ, რომ ეს არ არის ერთობა. ეს არის მოჩვენებითი ერთობა... მთავარი არ დაგვავიწყდეს. მაჟორიტარული ოლქები არის ძალიან მნიშვნელოვანი, მაგრამ 120 მანდატი თამაშდება ხალხო. პირველ ტურში გადაწყდება ამ არჩევნების ბედი, დამიჯერეთ, იმიტომ, რომ პროპორციული წესით თამაშდება 150-დან 120 მანდატი. რა თქმა უნდა, პირველ ტურში ოპოზიციური ჯამური ხმები მნიშვნელოვნად მეტი იქნება, ვიდრე „ქართული ოცნების“ და მეორე ტურები იქნება უკვე ფორმალობა ბიძინა ივანიშვილის წინააღმდეგ და ერთობის შემთხვევაში ძალიან ბევრ პირველ ტურს მოვიგებთ, რეალურ ერთობას თუ დავუპირისპირებთ მაჟორიტარულ ოლქებში“, განაცხადა ნიკა მელიამ.

მისი თქმით, მომავალ პარლამენტში ბიძინა ივანიშვილთან რაიმე ფორმით თანამშრომლობა და კოალიციის შექმნა გამორიცხულია.

„ვიღაცები დარდობენ, რომ ბიძინა ივანიშვილი ვიღაცებს მოისყიდის. ვერავინ ბიძინა ივანიშვილს კოალიციას ვერ შეუქმნის ვერასოდეს იმიტომ, რომ ბიძინა ივანიშვილს კოალიციას თუ უქმნი, ეს რას ნიშნავს იცით? ბიძინა ივანიშვილი კი არ რჩება ხელისუფლებაში, 2040 წლამდე თადუმაძე რჩება ხელისუფლებაში, ბიძინა ივანიშვილის იურისტი, უზენაესი სასამართლოს თავმჯდომარე. ამაზე ვერავინ ვერ წავა ხალხო. ახლა, მე, ნიკა მელია შევიდე პარლამენტში და ვუღალატო ოპოზიციას და ბიძინა ივანიშვილს... ხომ გამომეკიდეთ თოფით, თოხით, ბარით და ნიჩბით და ყველას იგივე ბედი ეწევა“, აღნიშნა მელიამ.