(GUARDIAN.GE) - წალკის მუნიციპალიტეტის სოფელ ჩივთქილისის სომხურენოვანი საჯარო სკოლის რუსული ენისა და ლიტერატურის მასწავლებელი სურიკ ბაბოიანი აცხადებს, რომ საქართველოში კორონავირუსის მართვის თვალსაზრისით მსოფლიოში ერთ-ერთი საუკეთესო მდგომარეობაა და მისი შეფასებით, ეს ხელისუფლების და ექიმების ერთობლივი დამსახურებაა.

„ყველა ვუყურებთ რაც ხდება მსოფლიოში. შორს წასვლა არ არის საჭირო. აგერ, მეზობელ სომხეთში არსებული მდგომარეობაც კმარა საკითხის შესაფასებლად. დღეს იქ უკვე 13 000-ზე მეტი ინფიცირებულია გამოვლენილი და ყოველდღიურად ძალზე სწრაფად იზრდება ვირუსით დაავადებულთა რაოდენობა. მხოლოდ ბოლო ერთი დღე-ღამის განმავლობაში, მაგალითად, 760-ზე მეტი ახალი ინფიცირებულია სომხეთში გამოვლენილი, საქართველოში კი, როგორც დღეს დილით მოვისმინე, მხოლოდ ერთი. ასევე ცუდად არის საქმე რუსეთში, სადაც ჩემი ნათესავები ცხოვრობენ. საქართველოში, მადლობა ღმერთს, ჩინებულად მიდის საქმე. ეს ჩემი აზრით, მთავრობის მიერ გატარებული მკაცრი ზომების და ასევე ექიმების დამსახურებაა. დროულად რომ არ ჩაეკეტათ საზღვრები, არ გამოეცხადებინათ საგანგებო მდგომარეობა, არ დაეწესებინათ კომენდანტის საათი, არ შეეჩერებინათ საზოგადოებრივი ტრანსპორტის მუშაობა და არ დაეწესებინათ მთელი რიგი სხვა შეზღუდვები, ვფიქრობ, დღეს ქვეყანაში ძალიან მძიმე სურათი იქნებოდა“, უთხრა GUARDIAN.GE-ის სურიკ ბაბოიანმა რუსულ ენაზე.

(GUARDIAN.GE-ის ფოტოზე: წალკის მუნიციპალიტეტის სოფელი ჩივთქილისა)

იგი განსაკუთრებულ მადლიერებას გამოხატავს ექიმების მიმართ და ამბობს, რომ საქართველოს მაღალი დონის მედპერსონალი ჰყავს.

„ჩვენი ექიმები დიდი პროფესიონალები არიან. თავად მომიწია რამდენიმე წლის წინ თბილისში ოპერაციის გაკეთება და ამაში პირადად დავრწმუნდი. არაფერს ვიტყვი მათ დღევანდელ ღვაწლზე. ყველანი ვუყურებთ, როგორი თავდადებით ემსახურებიან ისინი პაციენტებს“, აღნიშნა ბაბოიანმა.