უცხოეთიდან მისაღები 1.5 მილიარდი დოლარიდან ამ ეტაპზე 850 მილიონზე ხელშეკრულებები ხელმოწერილია, – განაცხადა ფინანსთა მინისტრმა, ივანე მაჭავარიანმა ანტიკრიზისული ბიუჯეტის პრეზენტაციის შემდეგ მედიის კითხვის საპასუხოდ, რა თანხები მიიღო დონორებისგან უკვე საქართველომ.

„1.5 მილიარდიდან ამ ეტაპზე 850 მილიონი არის ხელმოწერილი, ნაწილი ჩამოსულია, ნაწილი ხელმოწერილია, რატიფიცირებას გადის ამ კვირაში და უახლოეს კვირებში ჩამოვა, ეს არის 850 მილიონი. დანარჩენის შემთხვევაში ხელშეკრულებებზე მიმდინარეობს მუშაობა. ჩვენ ვვარაუდობთ, რომ უკვე ივნისი-ივლისის განმავლობაში, რაც ხელმოწერილია, ის ჩამოვა. წლის ბოლომდე თითქმის ყველა, მთელი თანხა ჩამოვა“, – განაცხადა მინისტრმა.

მინისტრის თქმით, აღსანიშნავია, რომ თანხის მობილიზება მეტობით მოხდა და თუ საჭირო არ გახდა, მთლიანი რესურსი წელსვე არ დაიხარჯება.

„ჩვენ რასაკვირველია, ეს სესხები და თანხის მობილიზება მეტობით გავაკეთეთ, ვემზადებოდით უფრო მძიმე სცენარისთვის. თუ ეს მძიმე სცენარი არ გათამაშდა, ჩვენ აღნიშნულ თანხას სრულად არ დავხარჯავთ ამ წელიწადში. ამ თანხის ნაწილი დაიხარჯება 2021 წელსაც, რათა არ მოგვიწიოს იქაც ძალიან დიდი ვალების აღება. ჩვენი მიზანია, არამარტო ჩავეტიოთ იმ პარამეტრში, რასაც ჰქვია 60 პროცენტიანი შეზღუდვა, არამედ ნელ-ნელა 55-დან, რომელსაც მივაღწევთ, დავიწყოთ უკუსვლა. ეს არის სასიცოცხლოდ მნიშვნელოვანი შემდეგი წლების ეკონომიკური განვითარებისთვის“, – აღნიშნა ივანე მაჭავარიანმა.