პარლამენტის დამოუკიდებელმა წევრმა, ეკა ბესელიამ კანონპროექტის სახით, პარლამენტს ახალ ინიციატივას წარუდგენს, რომელიც ნარკოტიკული საშუალებების მომხმარებლებისთვის მსჯავრდებული პირების მიმართ ამნისტიას შეეხება.

აღნიშნულ საკითხზე პარლამენტის წევრმა დღევანდელ ბრიფინგზე ისაუბრა. მისი განცხადებით, დაპირებული ნარკოპოლიტიკის რეფორმის განხორციელება დაგვიანდა და საპარლამენტო უმრავლესობის მხრიდან დღემდე არ არის მიღებული შესაბამისი ცვლილებები. ეკა ბესელიას შეფასებით, აუცილებელია, რომ კანონმდებლობაში აისახოს საკონსტიტუციო სასამართლოს ის გადაწყვეტილებები, რომლებიც ნარკოტიკების მომხმარებელთა მიმართ იქნა მიღებული.

„ამ ცვლილებების მიღებას, ნარკოპოლიტიკის რეფორმის განხორციელებას ეს პარლამენტი როგორც ჩანს არ ან ვერ აპირებს, ამიტომ ვაინიცირებ ამნისტიის კანონპროექტს, რათა უსამართლო სასჯელის მოხდისგან გათავისუფლდნენ ის პირები, რომლებიც ამ დრომდე სასჯელს იხდიან და საპატიმრო დაწესებულებებში იმყოფებიან. მიუხედავად იმისა, რომ განხორციელდა ნარკოდანაშაული შესაბამისი მუხლის გაყოფა, რეალიზაციის და მოხმარების კუთხით, მიუხედავად იმისა, რომ სასჯელთა შეკრების წესი გაუქმდა, ამ დრომდე ვერ მოხდა და არ მოხდა იმ მუხლების შესაბამისობაში მოყვანა, რომელიც ოდენობების მიხედვით ნარკოტიკების მოხმარებისთვის მსჯავრდებული პირებისთვის შეფარდებულ სასჯელს განსაზღვრავს. კანონპროექტის მიხედვით, ამნისტია შეეხებათ იმ პირებს, რომლებიც სასჯელს იხდიან ნარკოტიკული საშუალების შეძენის, შენახვის ან დამზადების ნიშნით კვალიფიცირებული დანაშაულისთვის. ასევე იმ პირებს, რომლებმაც მცენარე კანაფის ან მარიხუანას უკანონო შეძენა/შენახვისთვის ან და ექიმის დანიშნულების გარეშე ნარკოტიკული საშუალებების უკანონო მოხმარებისთვის იხდიან სასჯელს. კანონპროექტის თანახმად, იმ პირებს, რომლებსაც ამნისტია შეეხებათ, უნდა მოეხსნათ ნასამართლობა და აღუდგეთ ჩამორთმეული უფლებები“, - განაცხადა ეკა ბესელიამ.

კანონპროექტის ავტორმა ბრიფინგზე ის მუხლებ დაასახელა, რომლებსაც პროექტის მიხედვით, ამნისტია უნდა შეეხოს. კერძოდ, ამნისტია ეხება სისხლის სამართლის კოდექსის 260-ე მუხლის 1,2,3 და მე-6 ნაწილის ა პუნქტს, 262-ე მუხლის 1,2,3 და მე-4 ნაწილის ა ქვეპუნქტს და 273-ე მუხლს.