ჩვენ ვაძლევთ დამატებით დროს „ქართულ ოცნებას“, რომ მიიღოს გონივრული გადაწყვეტილება და საკონსტიტუციო ცვლილებების მეორე და მესამე მოსმენამდე გამოუშვას გიორგი რურუა, – განაცხადა „ევროპული საქართველოს“ წევრმა, ელენე ხოშტარიამ.

მისი თქმით, ხელისუფლებისგან განსხვავებით, „ევროპული საქართველო“ 8 მარტის შეთანხმების შესრულებას, ორივე ნაწილში, დიდი პასუხისმგებლობით უდგება .

„ჩვენ განსხვავებით, სამწუხაროდ, ხელისუფლებისგან, დიდი პასუხისმგებლობით ვუდგებით 8 მარტის შეთანხმების შესრულებას ორივე ნაწილში. გიორგი რურუა – პოლიტპატიმარი უნდა გამოვიდეს და მეორეს მხრივ, ჩვენ არ მივცემთ „ქართულ ოცნებას“ საშუალებას, რომ ჩააგდოს პროპორციული არჩევნები, რისი საფრთხეც, სამწუხაროდ, ხვალ არის.

აქედან გამომდინარე, ჩვენ ვაძლევთ დამატებით დროს „ქართულ ოცნებას“, რომ მიიღოს გონივრული გადაწყვეტილება და მეორე, მესამე მოსმენამდე გამოუშვას გიორგი რურუა. ერთის მხრივ, ჩვენ გადავარჩენთ პროპორციულ არჩევნებს და მეორეს მხრივ, ვაძლევთ შანსს სრული ნორმალიზებისთვის გიორგი რურუას გათავისუფლებით“, – განაცხადა ელენე ხოშტარიამ.

საკონსტიტუციო ცვლილებების განხილვა პარლამენტის რიგგარეშე სხდომაზე ხვალ არის დაგეგმილი.

საპარლამენტო ფრაქცია „ევროპული საქართველო“ კენჭისყრაში მონაწილეობას მიიღებს და საკონსტიტუციო ცვლილებებს მხარს დაუჭერს.

საქმე ეხება იმ საკონსტიტუციო ცვლილებების პროექტს, რომელიც 8 მარტის შეთანხმების საფუძველზე მომზადდა. ამ ცვლილებების შედეგად 2020 წლის საპარლამენტო არჩევნები 120-30 საარჩევნო მოდელით უნდა ჩატარდეს.