„დემოკრატიული მოძრაობა – ერთიანი საქართველოს“ წევრის, ირაკლი ბათიაშვილის განცხადებით, ემიგრაციაში მყოფი ყოფილი ხელისუფლების გარკვეული წრეები, ბიძინა ივანიშვილის ფიზიკურ ლიკვიდაციას გეგმავენ.


როგორც ბათიაშვილმა „პირველ პრესკლუბში“ განაცხადა, გარკვეული ჯგუფი წინასადაზვერვო სამუშაოებს ამზადებს, რათა ბიძინა ივანიშვილის ფიზიკური ლიკვიდაციის ტერორისტული აქტი განახორციელოს.


„დაახლოებით ორი წლის წინ, გავავრცელე ინფრომაცია იმის თაობაზე, რომ ემიგრაციაში მყოფი ყოფილი ხელისუფლების გარკვეულ წრეებში მიდიოდა ზოგადი საუბრები, ბიძინა ივანიშვილის ფიზიკური ლიკვიდაციის თაობაზე. ინფორმაცია მიღებული მქონდა აპრობირებული, სერიოზული წყაროებიდან, რომლებიც არსებობდნენ იმ პერიოდიდან, როდესაც მე საინფორმაციო სადაზვერვო სამსახურის თავმჯდომარე ვიყავი. ამჟამად კი მინდა განვაცხადო შემდეგი, რომ ემიგრაციაში მყოფი ყოფილი ხელისუფლების გარკვეულ წრეებში უკვე მიდის მუშაობა და მზადება, ბიძინა ივანიშვილის ფიზიკური ლიკვიდაციის ტერორისტულ აქტზე. ეს მუშაობა შესულია სერიოზულ ფაზაში, შეიძლება ითქვას, შერჩეულია მაღალკვალიფიციური პროფესიონალთა ჯგუფი, ვინც ორგანიზება და შესრულება უნდა გაუკეთოს საქმეს. ჩამოსულია გარკვეული ჯგუფი, რომლებმაც სიტუაციის წინასწარი დაზვერვა უნდა გააკეთონ“, - განაცხადა ბათიაშვილმა.


ირაკლი ბათიშვილის შეფასებით, აღნიშნული ქმედება გამიზნულია ქვეყენაში დესტაბილიზაციის შესაქმნელად და ხელისუფლების შესაცვლელად.


„ბიძინა ივანიშვილის ფიზიკური ლიკვიდაციის შემთხვევაში, ისედაც საკმაოდ სუსტი და მყიფე მდგომარეობაში მყოფი ხელისუფლება, ხუხულასავით დაიშლება, პარლამენტში კოალიციაც დაიშლება, ხოლო დარჩენილი მთავრობა ადვილად დასამარცხებელი იქნება, მასობრივი არეულობის ინსპირაციის ფონზე“, - აღნიშნა ბათიაშვილმა.


მისივე განცხადებით, არსებული ინფორმაციის ფონზე, ხელისუფლებას და ძალოვან სტრუქტურებს სერიოზული მუშაობა და  სიფხიზლე მართებთ, რათა დესტაბილიზაციის საფრთხე თავიდან იქნას აცილებული.


„ყოველივე ამასთან დაკავშირებით, დღევანდელ ხელისუფლებას და მის ძალოვან სტრუქტურებს, სერიოზული სიფხიზლე მართებთ, მაგრამ ამ მხრივ ძალიან ცუდი მდგომარეობა გვაქვს, როგორც კომპეტენციის, ასევე, საიმედოობის თვალსაზრისით, რადგანაც ძალოვანი სტრუქტურები არაკომპეტენტური და არასაიმედო კადრებითაა გაძეძგილი. კადრებით, რომლებიც საკმაოდ მაღალ თანამდებობაზე იყვნენ წინა რეჟიმის დროს კუდ-ში და სოდ-ში და დღესაც საკვანძო თანამდებობები უკავიათ. ზოგიერთი მათგანი კი კვლავაც ლოიალურობით გამოირჩევა ყოფილი ხელისუფლების მიმართ. მინდა გითხრათ, რომ შინაგან საქმეთა სამინისტროდან და უშიშროების სამსახურიდან ინფორმაცია ყოველდღიურად წყალივით გადის. მიუხედავად ამისა, უნდა გაკეთდეს ყველაფერი, რათა ქვეყანაში დესტაბილიზაცია ავიცილოთ“, - აღნიშნა ბათიაშვილმა „პირველ პრესკლუბში“.


pia.ge