(GUARDIAN.GE) - ამერიკის შეერთებული შტატების პრეზიდენტის, დონალდ ტრამპის ადმინისტრაციამ ახალი კორონავირუსის სამკურნალო წამლის, რემდესივირის მსოფლიოს თითქმის მთელი სამი თვის მარაგი წინასწარ შეისყიდა.

აშშ-ის ჯანდაცვის დეპარტამენტის მიერ გავრცელებულ განცხადებაში ნათქვამია, რომ ტრამპმა კომპანია „ჯილიედთან“ „საოცარ“ შეთანხმებას მიაღწია და აშშ ფირმის მიერ წარმოებული პროდუქციის 500, 000 დოზას მიიღებს - ივლისში მთელი პროდუქციის 100%-ს, აგვისტოში 90%-ს და სექტემბერშიც 90%-ს.

რემდესივირი „კოვიდ-19“-ის სამკურნალოდ პირველად ამერიკის შეერთებული შტატების ხელისუფლებამ დაამტკიცა და მკურნალობის პერიოდში საშუალოდ 6.25 ფლაკონის/ამპულის მიღებაა რეკომენდებული.

აშშ-ის ჯანდაცვის მთავარი ექსპერტი ანტონი ფაუჩი გამაფრთხილებლად აცხადებს, რომ ქვეყანაში კორონავირუსის ყოველდღიურმა შემთხვევებმა შესაძლოა 100, 000-ს მიაღწიოს.

ევროკავშირმა თავისი საზღვრების 15 სახელმწიფოსთვის გახსნის გადაწყვეტილება მიიღო და „უსაფრთხო“ ქვეყნებში, რომელთა მოქალაქეებსაც ევროკავშირში მოგზაურობა შეეძლებათ, საქართველოცაა შეყვანილი, მაგრამ ბრიუსელმა აღნიშნულ სიაში ამერიკის შეერთებული შტატები არ შეიყვანა.