„ნაციონალური მოძრაობის“ პოლიტიკური საბჭოს წევრი, რაჭა-ლეჩხუმის და ქვემო სვანეთის გუბერნატორი სააკაშვილის პრეზიდენტიბისას, ოთარ სირაძე შაბათს, ამბროლაურში მომხდარ ინციდენტს გამოეხმაურა და განაცხადა, რომ ეს „ქართული ოცნების“ პროვოკაცია იყო.

„როგორც ჩანს „ქართულმა ოცნებამ“ გადაწყვიტა წინასაარჩევნო პერიოდი წარმართოს პროვოკაციების მოწყობის და პოლიტიკურ ოპონენტებთან ფიზიკური დაპირისპირებების ფონზე.

გუშინ, ონში „ნაციონალური მოძრაობა“ შეუერთდა აქციას „არა ონის ჰესების კასკადს!“

აქციის მიმდინარეობის დროს ინტერვიუს ვაძლევდი „მთის ამბების“ ჟურნალისტს, რა დროსაც თბილისიდან ორგანიზებულად ჩამოყვანილმა სუსის „ტიტუშკებმა“ შეიგინეს ჩვენი (ნაციონალური მოძრაობის) მისამართით არაერთხელ. პასუხად მე ზრდილობისკენ მოვუწოდე.

მოგვიანებით, ეს უცნობი პროვოკატორები დამხვდნენ უკვე ამბროლაურში ჩემს სახლთან, სადაც ცხოვრობს ჩემი მოხუცებული დედა. ამ დროს კამერამომარჯვებულები მომადგნენ სახლთან და დამიწყეს „საქმის გარჩევა“, გინება, რომელიც გადაიზარდა მცირე ფიზიკურ შეხლა-შემოხლაში.

მე წინააღმდეგი ვარ ყოველგვარი ფიზიკური ძალადობის, აჯობებდა ეს ინცინდენტი არ მომხდარიყო, ვცდილობდი მის არიდებას, მაგრამ მხოლოდ ჩემზე არ იყო დამოკიდებული.

ვწუხვარ მომხდარი ფაქტის გამო“, წერს სოციალურ ქსელში ოთარ სირაძე.

რაჭა-ლეჩხუმ-ქვემო სვანეთის ყოფილმა გუბერნატორმა და „ნაციონალური მოძრაობის“ პოლიტიკური საბჭოს წევრმა, ოთარ სირაძემ ამბროლაურში „ახალგაზრდა მწვანეების“ აქტივისტს, ნიკოლოზ ღლონტს სცემა. პოლიციამ საქმე ხულიგნობის მუხლით აღძრა.