პარლამენტის აპარატის უფროსმა, გივი მიქანაძემ, ვიდეოკონფერენციის ფორმატში, მონაწილეობა მიიღო ღონისძიებაში თემაზე: „საქმიანობის უწყვეტობის მართვა საქართველოს პარლამენტში“.

როგორც გივი მიქანაძემ განაცხადა, ღონისძიებაში მონაწილე შოტლანდიელმა ექსპერტებმა, პანდემიის პირობებში, შოტლანდიის პარლამენტის საქმიანობის მენეჯმენტზე ისაუბრეს.

„მათ, ამ კუთხით, საკმაოდ დიდი გამოცდილება აქვთ და არსებული პანდემიის პირობებში საინტერესოა ამ პრაქტიკის გაცნობა. გაეროს და ევროკავშირის ერთობლივი პროექტი აპირებს ამ ექსპერტების ჩართულობით საქართველოს პარლამენტისთვის შეიმუშავოს მსგავსი დოკუმენტი, რა თქმა უნდა, პარლამენტის აპარატის ხელმძღვანელობის და დეპარტამენტების ხელმძღვანელობის მონაწილეობით, რომლის საფუძველზეც უფრო მომზადებული და უფრო მობილიზებული შეხვდება საქართველოს პარლამენტი არსებულ გამოწვევებს“, - განაცხადა პარლამენტის აპარატის უფროსმა.

გივი მიქანაძემ აღნიშნა, რომ საქართველოს პარლამენტმა პანდემიის პერიოდში საკმაოდ კარგად მოახდინა მობილიზება, კოორდინაცია და განვლილი რამდენიმე თვის განმავლობაში მის საქმიანობაში რაიმე შეფერხება არ ყოფილა.

„დისტანციურ რეჟიმზე გადასვლაც სწორედ ამ ფორმატის გათვალისწინებით განხორციელდა და პერსონალი საკმაოდ კარგად ადაპტირდა ამ კუთხით, მაგრამ შოტლანდიელი პარტნიორების გამოცდილებაც საკმაოდ საინტერესოა იმისთვის, რომ კიდევ უფრო დაიხვეწოს ჩვენი საქმიანობა და უფრო ეფექტურად ვმართოთ პროცესები“, - განაცხადა პარლამენტის აპარატის უფროსმა.

საქართველოს პარლამენტში საქმიანობის უწყვეტობის მართვის (BCM) კომპონენტის დანერგვას ახორციელებს ვესტმინსტერის დემოკრატიის ფონდი (WDF) ევროკავშირისა და გაეროს განვითარების პროგრამის ერთობლივი პროექტის „საქართველოს საპარლამენტო დემოკრატიის კონსოლიდაცია“ ფარგლებში.