2003 წელს, როცა საქართველოში პოლიტიკური ძალები ცენტრალური საარჩევნო კომისიის დაკომპლექტების წესზე ვერ თანხმდებოდნენ, "საქმეში ჩაერთო" ცნობილი ამერიკელი დიპლომატი, აშშ-ის ყოფილი სახელმწიფო მდივანი ჯეიმს ბეიკერი.

2003 წლის ივლისში ბეიკერი თბილისში ჩამოვიდა, შევარდნაძეს შეხვდა და შესთავაზა თავისი ფორმულა - 5+9+1. ბეიკერის ფორმულის მიხედვით, ცესკო-ში ხუთი წევრი ხელისუფლებას უნდა დაენიშნა, პოლიტიკურ ოპოზიციას 9 მანდატი ერთამეთში უნდა გაეყო, ხოლო ერთი წევრი – ნეიტრალური, ეუთო-ს მიერ შერჩეული უნდა ყოფილიყო. - "მთავარია საპარლამენტო არჩევნები თავისუფალ, სამართლიან გარემოში ჩატარდეს იმისათვის, რომ საქართველოში ხელისუფლების მშვიდობიანად გადაცემას ალტერნატივა არ ჰქონდეს", - განაცხადა ბეიკერმა. თავდაპირველად, შევარდნაძის ხელისუფლება და პოლიტიკური ოპოზიცია ჯიმი ბეიკერის შეთავაზებულ მოდელს დადებითად შეხვდნენ, თუმცა, საბოლოოდ საარჩევნო კანონმდებლობაში სათანადო ცვლილებების ასახვა "არ და ვერ მოხდა"...

P.S. დღესაც, საქართველოში პოლიტიკური მოვლენები ისე ვითარდება, რომ "გარედან რჩევის გარეშე" - შეიძლება რაიმე სისულელე ჩაიდინოს გაჯიუტებულმა ხელისუფლებამ და რევანშის სურვილით შეპყრობილმა ოპოზიციამ, რაც ქვეყნის სუვერენიტეტს და სახელმწიფოებრიობას დააზიანებს, თორემ კისერი უტეხია ორივეს! ამიტომ, ეს რომ არ მოხდეს, ძალიან მნიშვნელოვანი და "საინტერესოცაა" თუ ვინ იქნება "ბეიკერი 2", რომელიც წინამორბედისგან განსხვავებით, მკაცრად მოსთხოვს ყველას და პრინციპულად დაიცავს იმ საბოლოო საარჩენო შედეგებს, რომელიც დემოკრატიული და სამართლიანი არჩევნების შედეგად დადგება საქართველოში 31 ოქტომბერს, - 1 ნოემბერს გამთენიისას!

პოლიტოლოგი

ჯუმბერ კირვალიძე