თავდაცვისა და უშიშროების კომიტეტში, კომიტეტის თავმჯდომარის პირველი მოადგილის, კობა კობალაძის თავმჯდომარეობით, სამუშაო შეხვედრა გაიმართა. შეხვედრაზე განხილული იყო ვეტერანების საქმეთა სახელმწიფო სამსახურის მიერ მომზადებული საკანონმდებლო წინადადებები.

როგორც კობა კობალაძემ განმარტა, წარმოდგენილი საკანონმდებლო წინადადებები ითვალისწინებს ვეტერანებთან დაკავშირებით კანონმდებლობაში არსებული ხარვეზების აღმოფხვრას.

„ახალი კონსტიტუციიდან გამომდინარე, ჩვენი სახელწიფო გადასულია ტოტალური თავდაცვის პრინციპებზე და აქედან გამომდინარე, რეზერვისტების სამობილიზაციო გეგმაში ვეტერანების ადგილი და პრიორიტეტები ისე უნდა იყოს გაწერილი, რომ თითოეულმა ადამიანმა იცოდეს თავისი ადგილი, თავისი ამოცანა და ა.შ“, - აღნიშნა თავდაცვისა და უშიშროების კომიტეტის თავმჯდომარის პირველმა მოადგილემ.

მისივე თქმით, შეხვედრაზე საუბარი იყო სოციალური უზრუნველყოფის პაკეტზეც, რომელიც შესაბამისობაში უნდა მოვიდეს არსებულ კანონმდებლობასთან.

შეხვედრის მონაწილეებმა განიხილეს 2008 წლის რუსეთ-საქართველოს ომში მონაწილე რეზერვისტებისათვის ვეტერანის სტატუსის მინიჭებასთან დაკავშირებული საკითხები და ასევე, საერთაშორისო მშვიდობისა და უსაფრთხოების შენარჩუნებისა და აღდგენის ოპერაციებსა და სხვა სახის სამშვიდობო საქმიანობაში მონაწილე სამხედრო მოსამსახურეებისათვის ომისა და თავდაცვის ძალების ვეტერანის სტატუსის მინიჭების შესახებ პროექტი.

როგორც კობა კობალაძემ განაცხადა, მოხდა შეთანხმება, რომ შეიქმნება სახელმწიფო სტრუქტურების წარმომადგენელებით დაკომპლექტებული უწყებათაშორისი სამუშაო ჯგუფი.

„სამუშაო ჯგუფი წარმოდგენილი საკანონმდებლო წინადადებებისთვის საბოლო სახით ჩამოყალიბებაზე იმუშავებს, უწყებების ხელმძღვანელებთან პოზიციების შეჯერდება და 8 სექტემბერს გაიმართება გაფართოებული შეხვედრა“, - აღნიშნა თავდაცვისა და უშიშროების კომიტეტის თავმჯდომარის პირველმა მოადგილემ.