ჩვენ ეროვნული გმირის, გიორგი ანწუხელიძის მუნიციპალიტეტში ვიმყოფებით. აი, იმ დროს, როცა გიორგისნაირი გმირები თავგანწირვით იბრძოდნენ აგვისტოს ომში, ჩვენ ყველამ ერთად ვნახეთ დიდი ეროვნული სირცხვილი – ყოფილი პრეზიდენტის, იმ დროს მთავარსარდლის სიმხდალე, რაც ქართველ კაცს არ ახასიათებს, – განაცხადა პარტია „ქართული ოცნების“ პოლიტიკურმა მდივანმა, ირაკლი ღარიბაშვილმა კახეთში „ქართული ოცნების“ მაჟორიტარი დეპუტატობის კანდიდატის წარდგენისას.

„მინდა, ჩემს გამოსვლაში რამდენიმე აქცენტი გავაკეთო აგვისტოს ომთან დაკავშირებით. ვინაიდან, ეს ჩვენ მოგვწონს თუ არა, რა თქმა უნდა, ყველას ტკივილია, ჩვენი ტრაგედიაა. 12 წელი გავიდა აგვისტოს ომიდან და კარგად გვახსოვს ის ტრაგიკული დღეები, დიდი ტკივილი, რომელიც თითოეულმა ქართველმა განიცადა. საუბედუროდ, სააკაშვილის უსამართლო, უღირსმა ხელისუფლებამ ვერ აგვაცილა ეს უდიდესი განსაცდელი და ჩვენ, შედეგად მივიღეთ დამატებით ტერიტორიების დაკარგვა დროებით, ოკუპაცია, რაც ყველაზე მძიმე შედეგია ამ ომის. კოდორი, რომელიც რატომღაც დაავიწყდათ ამ დესტრუქციულ ოპონენტებს, ახალგორი, 100-ზე მეტი სოფელი, ათი ათასობით დევნილი, გაუბედურებული და, რა თქმა უნდა, ოჯახებდანგრეული და სახლებიდან აყრილი ჩვენი მოქალაქეები. აი, ეს არის ის მძიმე მემკვიდრეობა მეგობრებო, რომელიც ჩვენ სულ რაღაც რვა წლის წინ გადმოგვებარა და გადმოგვებარა არა შემთხვევით და ვინმეს კეთილი ნებით, არამედ თქვენი ძალით, ხალხის ძალით და ჩვენი ლიდერის, ბატონი ბიძინა ივანიშვილის ხელმძღვანელობით. აქ ვიმყოფებით ჩვენი ეროვნული გმირის, გიორგი ანწუხელიძის მუნიციპალიტეტში. დიდება მის სახელსა და ხსოვნას. აი, იმ დროს, როცა გიორგისნაირი გმირები თავგანწირვით იბრძოდნენ აგვისტოს ომში, ჩვენ ყველამ ერთად ვნახეთ დიდი ეროვნული სირცხვილი – ყოფილი პრეზიდენტის იმ დროს მთავარსარდლის სიმხდალე, რაც ქართველ კაცს არ ახასიათებს. ქართველი კაცის გულში და სულში არის სულ სხვა ბრძოლის მუხტი, სხვა სულია. ჩვენ ვიხილეთ დიდი ტრაგედია, ეროვნული სირცხვილი – მიწაზე გართხმული მთავარსარდალი, რომელიც დღესაც უნამუსოდ და უსირცხვილოდ აცხადებს პრეტენზიას“, – განაცხადა ირაკლი ღარიბაშვილმა.