(GUARDIAN.GE) – ამერიკის შეერთებული შტატების პრეზიდენტმა დონალდ ტრამპმა განაცხადა, რომ თავისი უმცროსი ძმა, რობერტ ტრამპი გარდაიცვალა. ძმის გარდაცვალებამდე ერთი დღით ადრე პრეზიდენტი მას ნიუ იორკის საავადმყოფოში სტუმრობდა.

„მძიმე გულით გიზიარებთ ამბავს, რომ ჩემი შესანიშნავი ძმა, რობერტი, ამაღამ მშვიდად გარდაიცვალა. იგი არა მხოლოდ ჩემი ძმა, არამედ ჩემი საუკეთესო მეგობარიც იყო. ის ძალზე მომენატრება, მაგრამ ჩვენ კვლავ შევხვდებით. მისი მოგონებები ჩემს გულში სამუდამოდ იცოცხლებს. რობერტ, მე შენ მიყვარხარ. მშვიდად განისვენე“, ნათქვამია ტრამპის შაბათ ღამით გავრცელებულ განცხადებაში.

რობერტ ტრამპი 71 წლის იყო. თავისი ძმის, ტელევარსკვლავ დონალდ ტრამპისაგან განსხვავებით, უძრავი ქონების დეველოპერი რობერტ ტრამპი ჩრდილში ყოფნას ამჯობინებდა.

ტრამპის თანაშემწის განცხადებით, პრეზიდენტი თავისი ძმის დასაფლავებას დაესწრება. მომდევნო დღეებში აშშ-ის პრეზიდენტს წინასაარჩევნო კამპანიის ფარგლებში დატვირთული გრაფიკი აქვს და 4 შტატში ვიზიტს გეგმავს.

რობერტ ტრამპის გარდაცვალების მიზეზი არ დასახელებულა. წყარომ, რომელიც ახლოს იცნობდა მდგომარეობას, განაცხადა, რომ ტრამპის ძმას სისხლი ჰქონდა გათხელებული.