საგარეო საქმეთა მინისტრის პირველმა მოადგილემ, ვახტანგ მახარობლიშვილმა, გამართა შეხვედრა ევროპული ბიზნეს ასოციაციის წარმომადგენლებთან, კერძოდ ასოციაციის თავმჯდომარესთან ჯონ ბრეაქეველდთან, ადგილობრივ აღმასრულებელ დირექტორთან მარიამ ქუჩულორიასთან და DCFTA-ის საკითხებში ეროვნულ ექპერტთან თენგიზ ლომითაშვილთან.

შეხვედრაზე ჯონ ბრეაქეველდმა მინისტრის პირველ მოადგილეს გააცნო ევროპული ბიზნეს ასოციაციის მიზნები, ძირითადი საქმიანობა და ასევე წარმოადგინა გერმანიის საერთაშორისო განვითარების (GIZ) სააგენტოს მხარდაჭერით მომზადებული კვლევა საქართველო-ევროკავშირის სავაჭრო ურთიერთობებისა განვითარების შესახებ და COVID-19-ის შედეგად არსებული გავლენისა და გამოწვევების შესახებ.

მხარეებმა განიხილეს ისეთი მნიშვნელოვანი საკითხები, როგორებიცაა ევროკავშირთან ღრმა და ყოვლისმომცველი თავისუფალი ვაჭრობის შეთანხმების (DCFTA) მაქსიმალური გამოყენების მიზნით გასატარებელი აუცილებელი ღონისძიებები, მათ შორის  ევროკავშირის ბაზარზე ეროვნული პროდუქციის ექსპორტის გაზრდის მიზნით ეროვნული მეწარმეების  ცნობიერების ამაღლება, კაპიტალთან წვდომა, პროდუქციის ხარისხის გაუმჯობესება და კონკურენტუნარიანობა, კანონმდებლობის დაახლოვების საჭიროება ევროკავშირის მოთხოვნებთან,  ქვეყანაში სპეციალიზებული ლაბორატორიების დაფუძნების აუცილებლობა და სხვა.

შეხვედრის დასასრულს ვახტანგ მახარობლიშვილმა მადლობა გადაუხადა ევროპული ასოციაციის წარმომადგენლებს პროდუქტიული შეხვედრისათვის და გამოთქვა მზაობა სამომავლო თანამშრომლობისათვის.

ინფორმაციას საგარეო საქმეთა სამინისტრო ავრცელებს.