"ჟივიე ბელარუს"!! - რეალური პოლიტიკური მდგომარეობა ბელარუსის გარშემო ისეთია, რომ როგორც ჩანს, რუსეთი ემზადება გაითამაშოს დასავლეთთან დიდი პოლიტიკური პასიანსი. მოსკოვი ეცდება დაითანხმოს ლუკაშენკო და გახდეს შუამავალი, დიალოგის ინიციატორი მასსა და ოპოზიციას შორის. დასავლეთი, თავის მხრივ, სთავაზობს მოსკოვს, რომ მან "დათმოს" ლუკაშენკოს ხელისუფლება და ექსკლუზიურად დაამყაროს პირდაპირი კავშირი ოპოზიციის საკორდინაციო საბჭოსთან. ან კიდევ, უახლოეს დღეებში "დააჯინოს" თავად ლუკაშენკო და მისი მოწინაღმდეგეები მოლაპარაკების მაგიდასთან, რათა თავიდან იქნას აცილებული მასშტაბური სისხლისღვრა და უზრუნველყოს ახალი არჩევნების ჩატარება, მშვიდობიან და სამართლიან გარემოში.

დიდი ალბათობით, სწორედ ეს თემები განიხილა მოსკოვში ლავროვთან შეხვედრისას, აშშ-ის სახელმწიფო დეპარტამენტის უფროსის პირველმა მოადგილემ სტივენ ბიგანმა, რომელიც მანამდე ლიტვაში შეხვდა ბელარუსის ოპოზიციის ამჟამინდელ ლიდერს სვეტლანა ტიხანოვსკაიას. დიახ, არ გამოვრიცხოთ, რომ კრემლი ამზადებს საფუძველს ლუკაშენკოს "უმტკივნეულო წასვლისათვის", თუმცა ჯერჯერობით ამას არ იმჩნევს და განაგრძობს მის მხარდაჭერას. ამ შესაძლო ვერსიას ადასტურებს, რუსეთის საგარეო საქმეთა მინისტრის სერგეი ლავროვის მოსაზრებები, რომელიც მან ამასწინათ გაახმოვანა: "რუსეთი არ ამბობს, რომ ლუკაშენკო "აუცილებლად უნდა დარჩეს".

რუსეთს უნდა, რომ ბელარუსებმა თავად გადაწყვიტონ საკუთარი ქვეყნის ბედი, გარედან ყოველგვარი ჩარევის გარეშე. მოსკოვი ყველას სთავაზობს, რომ ვცადოთ ახალი კონსტიტუციის მიღების ვარიანტი. ეს იქნებოდა შესაძლებლობა ალექსანდრე ლუკაშენკოსათვის, რომ იგი წავიდეს "ღირსეულად, - ხანძრის ვითარებაში ევაკუაციის გარეშე". ცნობისთვის, ვისაც ჩვენში ჰგონია, რომ რუსეთი ბელარუსის საკითხში "უკრაინულ გამოცდილებას გამოიყენებს", იგი ძალიან ცდება, რადგან უკრაინასა და ბელარუს შორის დიდი განსხვავებაა ყველა თვალსაზრისით: პოლიტიკური, სამხედრო, დემოგრაფიული, სოციალურ-ეკონომიკური და სხვა. ქართველი "პოლიტ-ანალიტიკოსებისაგან" განსხვავებით, ეს ძალიან კარგად ესმით კრემლში!..

საქმე ის გახლავთ, რომ 10 მილიონიან ბელარუსში, მოსახლეობის 83% ბელარუსია, რუსები მხოლოდ 7%-ს შეადგენენ (დანარჩენი 10% უკრაინელები, პოლონელები, ლიტველები, ებრაელები და სხვები არიან). ბელარუსი შედგება 6 ოლქისგან (მინსკის, ვიტებსკის, გროდნოს, გომელის, ბრესტის, მოგილიოვის), ამ ოლქებში რუსი ეროვნების ადამიანები კომპაქტურად არ ცხოვრობენ, განსხვავებით 45 მილიონიანი უკრაინისგან, სადაც 8 მილიონი რუსი ეროვნების ადამიანი ცხოვრობს, მათ შორის კომპაქტურად, წართმეულ ყირიმში (70% რუსი) და დონბასში, რომელიც 5 წელია ცეცხლის ალშია გახვეული.

სხვა პარამეტრებს არ შევეხები, იქაც დაახლოებით ასეთი სურათია. ამიტომ, რუსეთის პირდაპირი სამხედრო აგრესია ლუკაშენკოს "გადასარჩენად" გამორიცხულია, რადგან კრემლში კარგად იციან, რომ ბელარუსებისგან საპასუხოდ მიიღებენ ისეთივე სიძულვილს (პარტიზანულ ომს, ბელარუსები ამის "ოსტატები" არიან), როგორიც დღეს აქვთ უკრაინელებისაგან. ასეთი მასშტაბის ახალ სისხლისღვრას მოძმე სლავ ხალხებს შორის თავად რუსი ხალხი აღარ მოითმენს და არ აპატიებს პუტინის რეჟიმს!..

P.S. ასე რომ, - "ლუკაშენკოები მოდიან და მიდიან, ხოლო ბელარუსი ხალხი რჩება"! - ამიტომ, "ჟივიე ბელარუს"!!!

პოლიტოლოგი

ჯუმბერ კირვალიძე