(GUARDIAN.GE) - „ერთიანი ნაციონალური მოძრაობის“ პოლიტიკური საბჭოს წევრის, დეპუტატ თინათინ ბოკუჩავას განცხადებით, დასავლეთის მოლოდინია, რომ საქართველოში „სამართლიანი, გამჭვირვალე და თავისუფალი არჩევნები“ ჩატარდება და ამის შესახებ მაიკ პომპეომ პრემიერ გახარიასთან სატელეფონო საუბრისას მკაფიოდ მიანიშნა.

როგორც ბოკუჩავამ „ტვ პირველის“ პირდაპირ ეთერში თქვა, „მთელი პასუხისმგებლობა ეკისრება ბიძინა ივანიშვილს იმისთვის, რომ ეს არჩევნები იყოს ქართველი ხალხის ნების ამსახველი“.

„ჩვენ დემოკრატიულად, მშვიდობიანად, ნორმალურად, ცივილიზებულად ვაპირებთ ამ არჩევნებში შესვლას - ჩვენ, ანუ ოპოზიცია და რა თქმა უნდა, მთელი პასუხისმგებლობა ეკისრება ბიძინა ივანიშვილს იმისთვის, რომ ეს არჩევნები იყოს ქართველი ხალხის ნების ამსახველი. ეს არის ასევე ევროკავშირის და ჩვენი ამერიკელი პარტნიორების მოლოდინი და ძალიან ღიად ისაუბრა ამაზე სახელმწიფო მდივანმა მაიკ პომპეომ, როდესაც მან დაურეკა გიორგი გახარიას და მართალია, გახარია ეცადა, რომ დაემალა ამ შეხვედრის დეტალები, მაგრამ თავად პომპეომ გაასაჯაროვა იგი, როდესაც ისაუბრა მოლოდინზე ამერიკის შეერთებული შტატების მხრიდან სამართლიანი, გამჭვირვალე და თავისუფალი არჩევნების. რა თქმა უნდა, ყველას ძალიან კარგად გვესმის, რომ რუსეთის ინტერესი ძალიან დიდია იმიტომ, რომ დიახ, ხელისუფლებაში არის რუსული ოცნება, ხელისუფლებაში არის პუტინის ოცნება, დიახ, ხელისუფლებაში არის ისეთი ადამიანი, რომელიც ატარებს ღიად პუტინის ინტერესებს და ამაზე ღიად საუბრობენ უკვე ამერიკელები“, განაცხადა თინათინ ბოკუჩავამ.