მესტიის მუნიციპალიტეტში საკარანტინო რეჟიმის მოიხსნა და რამდენიმეკვირიანი იძულებითი პაუზის შემდეგ, 3 სექტემბრიდან ნატახტარი-მესტია-ნატახტარის მიმართულებით რეგულარული რეისები განახლდება.

„საქართველოს აეროპორტების გაერთიანების“ ინფორმაციით, სექტემბერში მესტიის მიმართულებით რეისები სამშაბათისა და შაბათის გარდა, კვირაში ხუთჯერ შესრულდება.

„სვანეთში ეპიდსიტუაციიდან გამომდინარე ნატახტარი-მესტიის მიმართულებაზე ფრენები 11 აგვისტოდან შეჩერებული იყო. თუმცა, მას შემდეგ, რაც სვანეთის ყველა მუნიციპალიტეტი გაიხსნა მესტიის მიმართულებით ფრენებიც აღდგა. აღნიშნული რეისებიც „კოვიდ-19“-დან გამომდინარე ყველა არსებული რეგულაციების დაცვით ხორციელდება, ეს იქნება სოციალური დისტანცირება, თერმოსკრინინგი, სავალდებულო პირბადის ტარება და სხვა. სვანეთი საქართველოს ერთ-ერთი პოპულარული ტურისტული მიმართულებაა და ვიმედოვნებთ, რომ ამ ულამაზეს რეგიონს ისევ მალე ბევრი ტურისტი ეწვევა”, – აცხადებენ საქართველოს აეროპორტების გაერთიანებაში.

ნატახტარიდან მესტიის მიმართულებით ფრენების შეჩერება ზემო სვანეთში „კოვიდ-19“-ის პრევენციის გამო მოხდა. დღეიდან, 2 სექტემბრიდან, დაბა მესტიასა და ლენჯერის თემში საკარანტინო შეზღუდვები მოიხსნა და აქედან გამომდინარე, 3 სექტემბრიდან, AK-Air Georgia მესტიის მიმართულებით ფრენებს განაახლებს.

მგზავრობის ღირებულება ზრდასრულთათვის - 90 ლარი;

▪ 3-დან 12 წლამდე ბავშვებისთვის ვრცელდება 30%-იანი ფასდაკლება;

▪ 3 წლამდე ჩვილებისთვის უფასო.