საავტომობილო გზებზე მოძრაობის შეუფერხებლად გადაადგილების მიზნით, საკომუნიკაციო ქსელებზე მომუშავე კომპანიებს საავარიო შემთხვევების გარდა, სამუშაოების წარმოება მხოლოდ ღამის საათებში შეეძლებათ, - განაცხადა თბილისის მერმა, კახა კალაძემ დედაქალაქის მთავრობის სხდომაზე და აღნიშნა, რომ დედაქალაქის მთავრობის სხვა ღონისძიებებთან ერთად, აღნიშნული გადაწყვეტილების მიზანი საცობებისგან განტვირთვა და ქალაქში ეკოლოგიური მდგომარეობის გამოსწორებაა.
როგორც კახა კალაძემ განაცხადა, სამუშაოების დაწყებასთან დაკავშირებით, გადაადგილების დროს შეფერხებისა და დისკომფორტის თავიდან ასაცილებლად, აუცილებელია წინასწარი შეტყობინების სისტემის დანერგვა.
დედაქალაქის მერმა ახალი რეგულაციით განსაზღვრული წესების მაქსიმალურად გაკონტროლება თბილისის მუნიციპალურ ინსპექციას, ხოლო პროცესის ზედამხედველობა მერის მოადგილე, ირაკლი ბენდელიანს დაავალა.
„ჩვენ ვამუშავებთ ტრანსპორტის გენერალურ გეგმას, რომელზეც საერთაშორისო კომპანიები მუშაობენ და უახლოეს მომავალში სრული სურათი გვექნება. პარალელურად, შეზღუდვები დავუწესეთ ნარჩენების გამტან მანქანებს, რომ დღის საათებში არ იმოძრაონ. განსაკუთრებით ცენტრალურ ქუჩებზე, რომ ღამის საათებში მოხდეს ნარჩენების გატანა. ასევე, აქტიური კომუნიკაცია მიმდინარეობს სადისტრიბუციო კომპანიებთან, რომ ავტომობილების მოძრაობა გარკვეულ დროში მოვაქციოთ. გარდა ამისა, გადაადგილების დროს სერიოზულ შეფერხებას სამარშრუტო ტაქსებიც იწვევდა. ამ მიმართულებითაც გამოყოფილი გვაქვს კონკრეტული ქუჩები, სადაც მიკროავტობუსის მძღოლებს გაჩერებების გარდა, სხვა ადგილებში გაჩერება ეკრძალებათ. ამას ჩვენი სამსახურები აკონტროლებენ და ვინც არღვევს, იმას შესაბამისი რეაგირება მოჰყვება.
ამასთან, ხშირია შემთხვევები, როდესაც ისეთი კომპანიების მხრიდან, როგორებიცაა: „თელასი“, „ჯორჯიან უოთერ ენდ ფაუერი“ (GWP) და სხვა, ავარიების დროს სამუშაოების დაწყება შეტყობინების გარეშე ხდება, რაც სერიოზულ პრობლემას იწვევს. ეს პრობლემა აუცილებლად უნდა მოგვარდეს, რასაც ირაკლი ბენდელიანს ვავალებ. ვიცი, რომ უკვე იყო კომუნიკაცია ყველა კომპანიასთან. თუ რაიმე სამუშაოა ჩასატარებელი, ეს ყველაფერი უნდა მოხდეს ღამის საათებში, რადგან დღის განმავლობაში ისედაც დიდი ნაკადებია, თან მალე სასწავლო პროცესი იწყება“, - განაცხადა კახა კალაძემ.
მისივე თქმით, მოსახლეობას სამუშაოების წარმოების შესახებ ინფორმაცია წინასწარ უნდა მიეწოდოს, რათა გადაადგილების დროს ნაკლები დისკომფორტი შეიქმნას.
„წინასწარ თუ ეცოდინებათ მოქალაქეებს სამუშაოებით გამოწვეული შეფერხების არსებობა, დისკომფორტს ავაცილებთ თავიდან. შესაბამისად, კომუნიკაცია არის მნიშვნელოვანი. შესაძლებელია, იყოს ავარია, გადაუდებელი პრობლემები, მაგრამ ამ ყველაფერს სჭირდება დაგეგმვა და სწორი მენეჯმენტი. ბევრი შემთხვევაა, როდესაც ქალაქის ცენტრში, დღის პიკის საათებში, კონკრეტულ მონაკვეთებში გაჩერებული ჰყავთ მანქანა და მიმდინარეობს სამუშაოები. ამ ყველაფრის დასარეგულირებლად, ჩვენ გარეშე ასეთი სამუშაოები არ უნდა ჩატარდეს. შესაბამისი სამსახურები, მუნიციპალური ინსპექცია ჩართეთ ამ პროცესში, რომ ეს ყველაფერი წესის შესაბამისად მოხდეს, იმისთვის, რომ გზებზე სამუშაოების გამო დისკომფორტი არ შევქმნათ“, - განაცხადა კახა კალაძემ.
ახალი რეგულაციის თანახმად, საკომუნიკაციო ქსელებზე მომუშავე კომპანიები ცენტრალურ ქუჩებზე სამუშაოებს დღისით მხოლოდ გადაუდებელი და საავარიო საჭიროების შემთხვევაში ჩაატარებენ, რასაც დედაქალაქის მერიასთან შეთანხმების საფუძველზე განახორციელებენ.
მოგესალმებათ საინფორმაციო სააგენტო GUARDIANGE-ის ადმინისტრაცია და გაცნობებთ, რომ სააგენტოს განახლების შედეგად, ამიერიდან ვებგვერდის ძველ ვერსიაზე -WWW.GUARDIAN.GE ხელმისაწვდომი იქნება 2023 წლის 7 სექტემბრამდე განთავსებული საინფორმაციო ხასიათის წერილობითი/ფოტო/ვიდეო მასალა, ხოლო განახლებული სააგენტოს ვებგვერდს შეგიძლიათ გაეცნოთ WWW.GUARDIANGE.COM-ზე.
ამერიკის შეერთებული შტატების არჩეულმა პრეზიდენტმა დონალდ ტრამპმა ჯანდაცვისა და სოციალური მომსახურების მდივნად ვაქცინაციის მიმართ სკეპტიკურად განწყობილი რობერტ ფიცჯერალდ კენედი უმცროსი, პრეზიდენტ ჯონ კენედის ძმისშვილი დაასახელა, რითაც დაასრულა დიდი ხნის მითქმა-მოთქმა კენედის გარშემო იმის შესახებ, თუ რა თანამდებობას დაიკავებდა იგი ტრამპის ადმინისტრაციაში.