საქართველოში სწავლის დაწყება ეპიდსიტუაციაზეა დამოკიდებული, თუმცა, განათლების სამინისტრო დღეს არის მზად, რომ 15 სექტემბერს სკოლებში სწავლა განაახლოს, – განაცხადა განათლების, მეცნიერების კულტურისა და სპორტის მინისტრის მოადგილემ, ეკატერინე დგებუაძემ საზოგადოებრივი მაუწყებლის პირველი არხის ეთერში.

„ჩვენ ვაგრძელებთ მუშაობას და მზადებას, რომ სასწავლო წელი 15 სექტემბერს დაიწყოს. რა თქმა უნდა, ძალიან აქტიური, ყოველდღიური თანამშრომლობა გვაქვს ჯანდაცვის სამინისტროსთან და ერთმანეთს ვუზიარებთ ინფორმაციას. ეს ყველაფერი ეპიდსიტუაციაზეა დამოკიდებული. თუმცა, განათლების სამინისტრო დღეს არის მზად იმისთვის, რომ 15 სექტემბერს სკოლებში სწავლა განაახლოს“,- განაცხადა დგებუაძემ და დაამატა:

„თუ სიტუაცია გართულდა, რა თქმა უნდა, ჩვენ გავითვალისწინებთ იმ რეკომენდაციებს, რომელსაც ჯანდაცვის სამინისტრო გასცემს“.

განათლების მინისტრის მოადგილის თქმით, ქვეყანაში უკვე ათასამდე სკოლა შემოწმდა.

„დღეს მიღებული სტატისტიკური მონაცემებით დაახლოებით, ათასამდე სკოლაში მოხდა მონიტორინგი. არის სკოლების გარკვეული რაოდენობა, რომლებმაც დოკუმენტის მიხედვით გაწერილი მოთხოვნები ვერ დააკმაყოფილეს და მათ აქვთ შესაძლებლობა, მონიტორის მიერ მიცემული რეკომენდაციის საფუძველზე ხარვეზები გამოასწორონ“, – განაცხადა დგებუაძემ, როგორც ამას პირველი არხი იტყობინება.

იმ შემთხვევაში, თუ სკოლა რეკომენდაციას არ გაითვალისწინებს, განათლების, მეცნიერების კულტურისა და სპორტის მინისტრის მოადგილემ აღნიშნა, რომ ამ შემთხვევაში სამინისტროს მოუწევს, ამ სკოლაში სასწავლო პროცესი არ დაიწყოს, რადგან წესების დაცვა ძალიან მნიშვნელოვანია.