ფრაქცია „ნაციონალური მოძრაობის“ თავმჯდომარე რომან გოცირიძე აცხადებს, რომ პარტიის შიდა კვლევები უკვე სრულდება და სამეგრელოს ერთ-ერთ ოლქში, ზუგდიდში, მალე დაასახელებენ კანდიდატს, რომელიც „ყველაზე კონკურენტუნარიანი იქნება“. თუმცა მას არ დაუკონკრეტებია ზუგდიდის მაჟორიტარი დეპუტატობის კანდიდატი იქნება თუ არა საქართველოს ყოფილი პრეზიდენტის, მიხეილ სააკაშვილის დედა, პროფესორი გიული ალასანია.

„სამეგრელოში სამი კანდიდატიდან ორში გადაწყვეტილება უკვე მიღებულია. ისინი ძალიან სერიოზული კანდიდატები არიან, რომელთაც პირველივე ტურში გამარჯვების დიდი შანსი აქვთ. რაც შეეხება მესამე ოლქს, ახლა მთავრდება ჩვენი შიდა კვლევები და დავასახელებთ იმ კანდიდატს, რომელიც ყველაზე კონკურენტუნარიანი იქნება. სამეგრელო ყოველთვის იყო „ნაციონალური მოძრაობის“ მხარდამჭერი. ეს არაერთმა არჩევნებმა გვაჩვენა, მათ შორის, საპრეზიდენტო არჩევნებმა. ასევე, სანდრა რულოვსის იმ არჩევნებში მონაწილეობამ, რომელიც ხელისუფლებამ გააყალბა. იმედი გვაქვს, „ნაციონალური მოძრაობა“ სამეგრელოში პირველივე ტურში გაიმარჯვებს“, უთხრა რომან გოცირიძემ ჟურნალისტებს.