პოლიტიკური კონტექსტის შეტანა, როდესაც ლმობიერება უნდა გამოიჩინო, არის ფაქტობრივად დაბრუნება სტალინიზმში, - ამის შესახებ საქართველოს პრეზიდენტმა, გიორგი მარგველაშვილმა ვაშინგტონში, ქართულ დიასპორასთან შეხვედრაზე აშშ-ში მცხოვრები ერთ-ერთი ემიგრანტის შეკითხვის - გეგმავს თუ არა საქართველოს პრეზიდენტი "პოლიტპატიმრების" შეწყალებას და აღნიშნულთან დაკავშირებით საკანონმდებლო პაკეტის მომზადებას - საპასუხოდ განაცხადა.
შეკითხვაზე პასუხისას პრეზიდენტმა ხაზი გაუსვა, რომ მას პარლამენტში საკანონმდებლო ინიციატივით შესვლის უფლება არ აქვს, შეწყალების საკითხს კი, ყოველთვის პოლიტიკური კონტექსტის გარეშე განიხილავს.
"მე არ მაქვს საკანონმდებლო ინიციატივის უფლება. მე კანონებს ვერ ვწერ, ვერც ვიღებ, მე მას მხოლოდ ვეტოს ვადებ ხოლმე, როცა ამის შესაძლებლობა მაქვს...
ჩვენ უნდა მივიდეთ ისეთ მართლმსაჯულებამდე, რომელიც გამორიცხავს ასეთ კითხვებს. ეს არის სტრატეგიულად მნიშვნელოვანი ჩვენი ქვეყნისთვის და ამ პროცესში ყველამ უნდა მივიღოთ მონაწილეობა – ვისაც ეჭვი ეპარება, ვისაც არ ეპარება და ა.შ. მე მართლა მჯერა ქართული მართლმსაჯულების და ქართული სასამართლოსი. წელს ჩემს მიერ დასახელებული 3 ადამიანი განაწესა პარლამენტმა უზენაეს სასამართლოში, მათ შორის ერთ-ერთი უზენაესი სასამართლოს თავმჯდომარედ. მე მჯერა, რომ ეს ადამიანები რეალურ რეფორმებს გაატარებენ და შექმნიან სისტემას, რომელიც უნდა იყოს და იქნება სტაბილურობის ერთ-ერთი გარანტორი დემოკრატიულ საზოგადოებაში. ჩვენ ამის ნიშნებს ვხედავთ, მაგრამ ასევე ვხედავთ კითხვის ნიშნებს და ამ კითხვის ნიშნებს სასამართლო სისტემამ უნდა უპასუხოს - კითხვას პოლიტიკური წარსულის მქონე პატიმრებთან დაკავშირებით თავიდან ბოლომდე პასუხი უნდა გასცეს სასამართლომ.
რაც შეეხება შეწყალებას, ეს არის ლმობიერების ფუნქცია, რომელიც გააჩნია სახელმწიფოს - არა სასამართლო გადაწყვეტილების გასწორების, არა შეცდომების გასწორების, არამედ სწორედ დამნაშავე ადამიანის მიმართ ლმობიერების გამოჩენის ფუნქცია. ეს ფუნქცია ჩემთვის ძალიან მნიშვნელოვანია და მე მას დიდი ყურადღებით ვეკიდები. შემიძლია ერთმნიშვნელოვნად განგიცხადოთ, რომ ეს უფლება არ იქნება გამოყენებული პოლიტიკურ კონტექსტში ან პოლიტიკური წინაპირობებით, არც იმისთვის, რომ გასწორდეს სასამართლოს განაჩენები. ეს არის სუფთა ლმობიერების გამოხატვა ამა თუ იმ მსჯავრდებულის მიმართ. შესაბამისად, მე შეწყალებას განვიხილავ პოლიტიკური კონტექსტის გარეშე. თქვენ იცით, რამდენად მძაფრად გამაკრიტიკეს, როდესაც შევიწყალე შესაწყალებელი ადამიანი, რომლის ოჯახის წევრიც პოლიტიკასთან არის კავშირში, მაგრამ მე სხვანაირად ვერ მოვიქცეოდი. პოლიტიკური კონტექსტის შეტანა, როდესაც ლმობიერება უნდა გამოიჩინო, არის ფაქტობრივად დაბრუნება სტალინიზმში", - განაცხადა გიორგი მარგველაშვილმა.
მოგესალმებათ საინფორმაციო სააგენტო GUARDIANGE-ის ადმინისტრაცია და გაცნობებთ, რომ სააგენტოს განახლების შედეგად, ამიერიდან ვებგვერდის ძველ ვერსიაზე -WWW.GUARDIAN.GE ხელმისაწვდომი იქნება 2023 წლის 7 სექტემბრამდე განთავსებული საინფორმაციო ხასიათის წერილობითი/ფოტო/ვიდეო მასალა, ხოლო განახლებული სააგენტოს ვებგვერდს შეგიძლიათ გაეცნოთ WWW.GUARDIANGE.COM-ზე.
ამერიკის შეერთებული შტატების არჩეულმა პრეზიდენტმა დონალდ ტრამპმა ჯანდაცვისა და სოციალური მომსახურების მდივნად ვაქცინაციის მიმართ სკეპტიკურად განწყობილი რობერტ ფიცჯერალდ კენედი უმცროსი, პრეზიდენტ ჯონ კენედის ძმისშვილი დაასახელა, რითაც დაასრულა დიდი ხნის მითქმა-მოთქმა კენედის გარშემო იმის შესახებ, თუ რა თანამდებობას დაიკავებდა იგი ტრამპის ადმინისტრაციაში.