ამ ფოტოებზე, რასაც ხედავთ, ყველა ეს ეკლესია-ტაძრები, მონასტრები, სამრეკლოები და ყოვლადწმიდა ღვთისმშობელის ხატები, სხვადასხვა დროს, რუსეთის სხვადასხვა რეგიონში არის აშენებული, დაწერილი და უამრავი რუსი მორწმუნე, მართლმადიდებელი ქრისტიანი ლოცულობს ამ ტაძრებში, სადაც დაბრძანებულები არიან ეს წმინდა ხატები! ამის შესახებ პოლიტოლოგი ჯუმბერ კირვალიძე Facebook-ის პირად გვერდზე წერს და რუსული ეკლესია-ტაძრების ათეულობით ფოტოს აქვეყნებს.

"იცით, რა აერთიანებთ ამ ეკლესია-მონასტრებს? ის, რომ ყველანი არიან - ივერიის ყოვლადწმინდა ღვთისმშობლის ხატის სახელობის! ჰოდა, ნამდვილი პარადოქსია, როდესაც ამ ქვეყნის საერო და საეკლესიო პირები, ხმას არ იღებენ და არ აპროტესტებენ მათი ხელისუფლების პოლიტიკას, რაც გამოიხატება ივერიის, ანუ საქართველოს დანაწევრებაში, იმ ქვეყნის ტერიტორიების მიტაცებაში, რომელიც ივერიის ყოვლადწმინდა ღვთისმშობლის ხატის მფარველობის ქვეშაა!! საოცარია, ალბათ, ეშმაკის "ხელი ურევია", როცა მარჯვენა ხელით პირჯვარს იწერენ და ივერიის ყოვლადწმინდა ღვთისმშობლის ხატის სახელობის ეკლესიაში შედიან, ივერიის ღვთისმშობლის ხატს თაყვანსცემენ, ეამბორებიან და პარალელურად, "მარცხენა ხელით", ბრძანებას გასცემენ, სწორედ იმ ქვეყნის და ხალხის დასამონებლად, ვის სახელსაც ატარებენ ის ეკლესიები და ხატები, სადაც ეს ფარისევლები (სხვა რა ვუწოდო?!) დადიან და ლოცულობენ!!! სამწუხაროდ, თუ გონზე არ მოვიდნენ და არ შეწყვიტეს ეს უმსგავსობა, ანტიქრისტიანული საქციელი, ამისთვის აუცილებლად დაისჯება რუსეთი და რუსი ხალხი, სწორედ ივერიის ყოვლადწმინდა ღვთისმშობლის ხატის მეოხებით, რომელიც წარსულშიც, აწმყოშიც და მომავალშიც, უწინარესად(!!!), - ივერიის, საქართველოს და ივერიელების, ქართველების მფარველი და შემწე იყო, არის და იქნება, უკუნითი უკუნისამდე, ამინ.

P.S. რუსების დიდმა უმრავლესობამ არ იცის, რომ ივერია, იგივე საქართველო, არის ყოვლადწმინდა ღვთისმშობლის წილხვედრი ქვეყანა! დიახ, რუსების 95% არცკი იცის, რომ ივერია - საქართველოა!! მათთვის, საქართველო - "გრუზიაა"!!! - წერს ჯუმბერ კირვალიძე.