საქართველოს თავდაცვის სამინისტრო აგრძელებს ტერიტორიული რეზერვის პროგრამას, რომელიც ქვეყნის თავდაცვაში მოქალაქეების ჩართულობას და სამობილიზაციო რესურსის ოპტიმალურად გამოყენებას უზრუნველყოფს.

პროგრამის შესახებ თავდაცვის სამინისტროს ეროვნული გვარდიის წარმომადგენლებმა, მაიორმა, ფრიდონ მახარაძემ და კაპიტანმა, ზაალ გარუჩავამ, მესტიის მუნიციპალიტეტის მერთან და ადმინისტრაციული ერთეულის წარმომადგენლებთან შეხვედრა გამართეს.

ეროვნული გვარდიის მაიორის განცხადებით, აქტიური რეზერვი საქართველოში სამხედრო სამსახურის ახალი სახეა. საქართველოში სარეზერვო სამსახური ორი სახისაა – აქტიური და სამობილიზაციო სამსახური. აქტიური რეზერვი ნებაყოფლობითია, მასში მიიღებიან ქ. თბილისის, ქ. მცხეთის, კახეთის, სამეგრელო-ზემო სვანეთის, აჭარის და გურიის რეგიონებში მცხოვრები 18-დან 50 წლამდე ასაკის მოქალაქეები და 18-დან 22 წლის ჩათვლით სტუდენტები.

აქტიურ რეზერვში სამსახური ხუთ წელს გრძელდება და საბრძოლო მომზადებას წელიწადში მხოლოდ 45 დღეს გულისხმობს. აქედან გამომდინარე, რეზერვისტებს შეუძლიათ ცხოვრების ჩვეული სტილი არ შეიცვალონ და განაგრძონ სწავლა ან მუშაობა. რეზერვში ჩარიცხული რეზერვისტის მინიმალური წლიური ანაზღაურება შეადგენს 2700 ლარს.

მაიორის, ფრიდონ მახარაძის განცხადებით, პროგრამა მორგებულია სტუდენტებზე, რომლებიც სარეზერვო სამსახურის ერთი კონტრაქტის შემდეგ, მისი დასრულების შემდეგ, სამხედრო სავალდებულო სამსახური გავლილად ჩაეთვლებათ.

თავდაცვის სამინისტროს წარმომადგენლების განცხადებით ტერიტორიულ რეზერვში არ მიიღებიან პირები, რომლებიც გასამართლებული არიან განზრახ ჩადენილი დანაშაულისთვის, გათავისუფლებული არიან სამხედრო სამსახურიდან დისციპლინური საქციელის ან სამხედრო მოსამსახურის ღირსების დამამცირებელი მოქმედებისთვის, ასევე ვინც არ წარმოადგენს ცნობას ნარკოლოგიური შემოწმების შესახებ.

მსურველებს შეუძლიათ ონლაინ რეგისტრაცია გაიარონ ვებგვერდზე http://onlinebct.mod.gov.ge/ დამატებითი ინფორმაციის მიღება კი შესაძლებელია თავდაცვის სამინისტროს ოფიციალურ ვებგვერდზე http://mod.gov.ge/ 

ინფორმაციას მესტიის მერია ავრცელებს.