საქართველოს პრემიერ მინისტრმა, გიორგი გახარიამ ლარის კურსთან დაკავშირებით დასმული კითხვის საპასუხოდ ჟურნალისტებს უთხრა, რომ დღეს, საქართველოს მთავრობას და ეროვნულ ბანკსაც საჭიროზე მეტი რესურსი აქვს იმისთვის, რომ ეკონომიკური აღდგენა სწრაფად დაიწყოს, რაც პირდაპირ სწრაფ ზეგავლენას მოახდენს ლარის კურსზე.

„ყველას ძალიან კარგად გვესმის და პირველ რიგში, მე ძალიან კარგად მესმის, რომ ლარის კურსი არ არის მხოლოდ ეკონომიკური ფაქტორი, ჩვენს ქვეყანაში ლარის კურსი არის სოციალური ფაქტორიც. ეს ძალიან კარგად გვესმის და გაცნობიერებული გვაქვს. რა თქმა უნდა, დღეს ლარი ზედმეტად გაუფასურებულია, იმიტომ, რომ ყველას კარგად უნდა გვესმოდეს, მაკროეკონომიკური მაჩვენებლები ლარის კურსის დღევანდელი ნიშნულისთვის არ არსებობს. მიუხედავად იმისა, რომ გლობალური კრიზისია, საქართველო მაკროეკონომიკურად, ასე თუ ისე, ნორმალურ პარამეტრებშია. ბევრი რამ არის დამოკიდებული ემოციებზე და მოლოდინებზე. გასაგებია, რომ გლობალური პანდემია გვაქვს, გასაგებია, რომ ინფიცირებულების რაოდენობის ზრდა გვაქვს, გასაგებია, რომ არჩევნების მოლოდინია, შესაბამისად ყველამ უნდა გავითვალისწინოთ ეს. არ დაგვავიწყდეს ზაფხული, როდესაც პირველი ტალღისას, ლარის კურსის მკვეთრი გაუფასურება იყო, მაგრამ შემდგომ ის ნორმალურ ნიშნულს დაუბრუნდა. მინდა დაგარწმუნოთ, რომ დღეს საქართველოს მთავრობას და ეროვნულ ბანკსაც საჭიროზე მეტი რესურსი აქვს იმისთვის, რომ ჩვენი ეკონომიკური აღდგენა სწრაფად დაიწყოს, რაც პირდაპირ სწრაფ ზეგავლენას მოახდენს ლარის კურსზე“, - განაცხადა მთავრობის მეთაურმა.