ვაკის საარჩევნო ოლქში მაჟორიტარი დეპუტატობის დამოუკიდებელი კანდიდატი, ბიძინა გეგიძე, წინასაარჩევნო კვლევების შედეგებს არ ენდობა და აცხადებს, რომ მიმდინარე პროცესები მოსახლეობის შეცდომაში შეყვანას ემსახურება.

საშემოდგომო სესიის პლენარულ სხდომაზე გაკეთებული განცხადებისას ბიძინა გეგიძემ აღნიშნა, რომ 2020 წლის საპარლამენტო არჩევნები არ უზრუნველყოფს თანასწორუფლებიანობისა და სამართლიანობის პრინციპების დაცვას. 

„მიმდინარე მოვლენებს მეც ვაკვირდები, როგორც დამოუკიდებელი კანდიდატი ვაკის საარჩევნო ოლქში. განცხადებები და ე.წ. კვლევები, რომელიც ქვეყნდება, არ შეესაბამება სინამდვილეს და ეს არის, თავიდან ბოლომდე, მსხვილმასშტაბიანი ტყუილი. შეიძლება ეს არის წინასწარი ზემოქმედება ამომრჩეველზე, რომ ხელისუფლება და ასევე საპრიზო ადგილზე მყოფი პოლიტიკური დაჯგუფებები, გარიგებების შედეგად მიღწეული თანმიმდევრობით გაინაწილებენ მანდატებს მომავალ პარლამენტში. მეორე ვარიანტი არის ის, რომ შეიძლება ეს არის ფსიქოლოგიური ზემოქმედება ამომრჩევლებზე, რომ მაინც არაფერი შეიცვლება და მოქალაქეების პოზიციის გამოხატვას აზრი არ აქვს. არც ერთი და არც მეორეც არ გამოხატავს დემოკრატიის სტანდარტს და არ შედის ჩვენი ქვეყნის ინტერესებში. ორივე მათგანი ემსახურება ტყუილის ტირაჟირებას. არ ჩანს, რომ ხელისუფლება მინიმალური სტანდარტით მაინც აპირებს ოდნავ სამართლიანი არჩევნების ჩატარებას.

ჩემი გამოსვლა არ ემსახურება იმას, რომ რადიკალური განცხადებები გავაკეთო, თუმცა, მიმდინარე პროცესები მორიგი ნეგატივი და სიყალბეა. კარგად ახსოვს ქართველ ხალხს წინასწარ გაცხადებული კვლევებისა და ეგზიტპოლების სახით, არაადექვატური რიცხვები და მონაცემები.

მიუხედავად ყველაფრისა, ჯერ კიდევ არის დრო, ხელისუფლებამ და ყველა იმ პოლიტიკურმა დაჯგუფებამ, რომელიც სხვადასხვა ფორმით მონაწილეობს ამ სიცრუის ტირაჟირებაში, სწორი დასკვნები გააკეთოს და თავი გაანებონ ხალხის მოტყუებას. არ უნდა დავუშვათ, რომ მორიგ ჯერზე მოატყუონ ქართველი ხალხი. არ უნდა დავემსგავსოთ ქვეყანას, სადაც ნებისმიერი გზით ხელისუფლებაში დარჩენა შესაძლებელია. ასე გაგრძელება არჩევნების ლეგიტიმაციის სერიოზულ პრობლემას შექმნის.“ - აცხადებს ბიძინა გეგიძე.