სამწუხაროდ, ბოლო პროვოკაციას, რომელსაც ჩვენი შტაბის წევრები წამოეგენ, შედეგად კონკრეტული პირების სისხლის სამართლის პასუხისგებაში მიცემა მოჰყვა, –განაცხადა საპარლამენტო უმრავლესობის ლიდერმა, მამუკა მდინარაძემ.

„სამწუხაროდ, ბოლო პროვოკაციას, რომელსაც ჩვენი შტაბის წევრები წამოეგენ, შედეგად კონკრეტული პირების სისხლის სამართლის პასუხისმგებლობაში მიცემა მოჰყვა. სხვა ძალიან სერიოზულ ფაქტორებთან ერთად, ამ ფაქტის გამოც ყველას მოვუწოდებთ, მაქსიმალურად თავი შეიკავონ პროვოკაციაზე აყოლისგან. როგორც ვხედავთ, სამწუხაროდ, გარდა იმისა, რომ ეს ყველაფერი პროცესს აზიანებს და „ნაცმოძრაობის“ წისქვილზე ასხამს წყალს, ამას შედეგად მოჰყვება პასუხისმგებლობა, რადგან ძალადობას არაფერი ამართლებს და არგუმენტი არ არსებობს, რის გამოც სამართალდამცავმა ან ვინმემ უნდა გაამართლოს კონკრეტული პირის რაიმე ბრალეული ქმედება.

ამას რევანშის სახით მეორე დღესვე, შედეგად მოჰყვა დაკავებული შუბითიძის ძმის ძალიან მძიმე ფიზიკური დაზიანება. მას სახის ყველა ძვალი მოტეხილი და დაზიანებული აქვს. მას საკმაოდ მძიმე ოპერაცია ჩაუტარდა, რადგან მეორე დღეს, დახვდნენ და სასტიკად სცემეს. ახლა კიდევ უფრო თამამად შეგვიძლია ვთქვათ, რომ ეს იყო მისი ძმის მიმართ შურისძიება. ეს ადამიანი არის საარჩევნო სპეციალისტი, იცით, რომ საარჩევნო კომისიებში ჩვენი წევრების დაკომპლექტება მიმდინარეობს, მათ ორი კურდღლის დაჭერა სცადეს და ეს მძიმე დანაშაული ჩაიდინეს“, – განაცხადა მდინარაძემ.

ჟურნალისტების კითხვაზე, რატომ ამ დრომდე არ მოხდა სამართლებრივი რეაგირება, მდინარაძემ უპასუხა, რომ საგამოძიებო მოქმედებებს კონკრეტული ვადები სჭირდება.

„თქვენ რომ ხედავთ, კამერები არსებობს, იმას სჭირდება კონკრეტული საპროცესო დამაგრება, საპროცესო მოქმედებები, მოწმეების გამოკითხვა. ეს მარტივად არ ხდება, სჭირდება სასამართლოს განჩინებები. საგამოძიებო ვადებს თქვენ ვერ დააწესებთ, დაწესებულია და გონივრული ვადები არსებობს იმისთვის, რომ მტკიცებულებების დამაგრება მოხდეს. ისე არ ხდება, როგორც “ნაციონალური მოძრაობის” დროს ხდებოდა, როცა ორ საათში შეეძლოთ დაეჭირათ, რადგან იქ მტკიცებულებები არ იყო. დღეს უნდა იყოს შეთანხმებული მტკიცებულებათა ერთობლიობა, რომ ადამიანი ბრალდებულად პასუხისგებაში მისცე. ეს დრო არ არის ორი საათი, ხან ოთხი დღეა და ხან ოთხი თვე, გააჩნია, საქმის სირთულეს“, – განაცხადა მდინარაძემ.