ჩვენ არ გვაქვს ბევრი დრო, რომ ვიფიქროთ და ვიჭორაოთ წარსულზე, ჩვენი მთავარი მიზანია, ვიყუროთ წინ, რათა, მიუხედავად ყველაფრისა, ყველა კარგად ვხედავდით, მესტია როგორ ვითარდება, – განაცხადა საქართველოს პრემიერ მინისტრმა, გიორგი გახარიამ მესტიაში, „ქართული ოცნების“ მაჟორიტარი დეპუტატობის კანდიდატის, გოჩა ენუქიძის წარდგენისას.

როგორც გიორგი გახარიამ აღნიშნა, ბოლო წლების განმავლობაში სვანეთის ინფრასტრუქტურაში დაახლოებით 150 მლნ-ზე მეტი ჩაიდო.

„უნიკალური კუთხის, უნიკალური ფასეულობების, უნიკალური ენისა და ხასიათის ადამიანები ხართ თქვენ. ჩვენ დღეს დიდი მიშა ხერგიანის სახელობის სახლ-მუზეუმში ვიყავით და იქ ყველაფერი ჩანს ნათლად. თვითონ ფაქტები გვეუბნება, სად ვიმყოფებით ახლა დღეს, მაგრამ აქედან ყველაზე დიდი და მნიშვნელოვანი არის ის, რომ თქვენ ხართ და ეს კუთხეა საქართველოს უნიკალური მემკვიდრეობის მცველი. ეს არის ყველაზე დიდი ღვაწლი, რისთვისაც სრულიად საქართველო აფასებს და ყოველთვის დააფასებს სვანებს“, – განაცხადა გიორგი გახარიამ.