მთავრობის ინიციატივითა და ჯანდაცვის სამინისტროს უშუალო მონაწილეობით, 25-30 ოქტომბრიდან საქართველო „რემდესივირს“ მიიღებს, – განუცხადა თბილისის ინფექციური საავადმყოფოს დირექტორმა, თენგიზ ცერცვაძემ ჟურნალისტებს.

ცერცვაძის თქმით, საქართველომ გამონახა გზები, რომ „რემდესივირი“ ქვეყანაში სწრაფად შემოსულიყო.

„მთავრობის ინიციატივითა და ჯანდაცვის სამინისტროს უშუალო მონაწილეობით განხორციელდა ახალი და დღეისთვის ყველაზე იმედისმომცემი მედიკამენტის, „რემდესივირის“ სწრაფი შემოტანა. ეს მედიკამენტი ფუფუნებაა, რადგან ჯერ მხოლოდ ამერიკას აქვს საშუალება, ჰქონდეს ეს მედიკამენტი. კიდევ რამდენიმე ქვეყანა არის შეძენის პროცესში. როგორც ჯანდაცვის მინისტრმა ბრძანა, შემუშავებულია უკვე მექანიზმი, რომელიც იოლი არ იყო, რადგან ბევრი ქვეყანა დგას მედიკამენტის რიგში, ასევე ბევრი ბიუროკრატიული პროცედურაა გასავლელი. ზოგიერთ შემთხვევაში ორი თვე სჭირდება წამლის მოწოდებას, თუმცა აქ გამოინახა მექანიზმები, რომ 10-14 დღეში მოწოდება განხორციელდება და სადღაც, 25-30 ოქტომბრიდან საქართველოს მოქალაქეებს, რომლებსაც აქვთ კორონავირუსის მძიმე ან კრიტიკული ფორმა, სამკურნალოდ დაემატებათ „რემდესივირი“, ხოლო შედარებით შორეულ მომავალში ხელმისაწვდომი გახდება მონოკლონური ანტისხეულებიც“, – განაცხადა ცერცვაძემ.