(GUARDIAN.GE) - საგარეჯოს მუნიციპალიტეტის სოფელ ლამბალოს აზერბაიჯანულენოვან საჯარო სკოლაში 15 სექტემბერს განახლებული სასწავლო პროცესი ამ დრომდე შეუფერხებლად მიმდინარეობს.

აღნიშნულის შესახებ GUARDIAN.GE-ის ლამბალოს საჯარო სკოლის დირექტორმა, დავით როსტომაშვილმა განუცხადა.

დირექტორის თქმით, 2016 წელს განათლებისა და მეცნიერების სამინისტროს მიერ 4,5 მილიონ ლარად აშენებულ ახალ სკოლაში 2020-2021 სასწავლო წელს 1 300-მდე მოსწავლე ირიცხება.

დავით როსტომაშვილის განცხადებით, ჯანდაცვის და განათლების სამინისტროების მიერ პანდემიასთან დაკავშირებით შემუშავებული ყველა რეკომენდაცია ზედმიწევნით მკაცრად სრულდება და ამ დრომდე სკოლაში კორონავირუსის არც ერთი შემთხვევა არ დაფიქსირებულა.

„სკოლა, თავადაც უყურებთ, სრულად არის მოწესრიგებული და ყველა ის ნორმა მკაცრად არის დაცული, რაც განათლების და ჯანდაცვის სამინისტროების მიერ შემუშავდა პანდემიიდან გამომდინარე.

„სკოლაში განთავსებულია დეზობარიერები, ხდება მოსწავლეების, მასწავლებლების და ყველა თანამშრომლის თერმოსკრინინგი, შესვენებებზე მოსწავლეები კლასებში რჩებიან და მხოლოდ გადაუდებელი საჭიროების შემთხვევაში ტოვებენ საკლასო ოთახებს.

„მადლობა ღმერთს, ჩვენს სკოლაში, სადაც 1 300-მდე მოსწავლე სწავლობს და ორცვლიანი სწავლება მიმდინარეობს, დღემდე, ვირუსის არც ერთი შემთხვევა არ გამოვლენილა. სასწავლო პროცესი ამ დრომდე შეუფერხებლად მიმდინარეობს“, განუცხადა GUARDIAN.GE-ის დავით როსტომაშვილმა.

GUARDIAN.GE-ის ფოტოზე: საგარეჯოს მუნიციპალიტეტის სოფელ ლამბალოს საჯარო სკოლის დირექტორი დავით როსტომაშვილი მანდატურებთან