გიგი უგულავა არის ერთადერთი ქარიზმატული, გამოცდილი პოლიტიკოსი სამეგრელოს რეგიონიდან, ვისაც შეგიძლია, ენდო და დაეყრდნო, ეს არის პირადი პოზიციაც და რეალობაც, – განაცხადა „ლეიბორისტული პარტიის“ ლიდერმა, შალვა ნათელაშვილმა ზუგდიდში.

როგორც ნათელაშვილმა აღნიშნა, ქართულ პოლიტიკაში ამინდს ქმნის ზუგდიდი და სამეგრელო.

„ორ კვირაში ზუგდიდს შეუძლია, ჩვენს ქვეყანას მოაცილოს ოკუპანტი, დამპყრობელი სახელმწიფოს წარმომადგენელი ხელისუფლება, დაუბრუნოს ჩვენს ხალხს ძალაუფლება, რის შემდეგაც ენგურს გაღმა დავიწყებთ მსვლელობას და გავალთ ფსოუმდე. დავიბრუნებთ, რაც ჩვენ გვეკუთვნის და რაც ჩვენი დასაბრუნებელია. ეს დიდი ისტორიული მისია აკისრია ზუგდიდსა და სამეგრელოს. ვიცი, რომ 31 ოქტომბერს გამარჯვების დროშები იქნება აფრიალებული მთელი საქართველოსა და დემოკრატიული მსოფლიოს სასიხარულოდ. გიგი უგულავა დღეს არის ერთადერთი ქარიზმატული, გამოცდილი პოლიტიკოსი სამეგრელოს რეგიონიდან, ვისაც შეგიძლია, ენდო და დაეყრდნო, ეს არის პირადი პოიზიცაც და რეალობაც. ის, როგორც ხელისუფალი იყო ღირსეული ოპონენტი და არის ღირსეული თანამებრძოლი“, – განაცხადა შალვა ნათელაშვილმა.