(GUARDIAN.GE) - სსიპ საგარეჯოს მუნიციპალიტეტის სოფელ ლამბალოს საჯარო სკოლა, სადაც 2020-2021 სასწავლო წელს მოსწავლეთა რაოდენობა გაიზარდა და ის 1350-ს შეადგენს, 15 სექტემბერს ტრადიციულად, საკლასო ოთახებში განახლებულ სწავლის პროცესს შეფერხების გარეშე, განათლებისა და ჯანდაცვის სამინისტროების მიერ დაწესებული სტანდარტების შესაბამისად განაგრძობს.

GUARDIAN.GE-ის ფოტოზე: ლამბალოს საჯარო სკოლის დირექტორი დავით როსტომაშვილი 

აღნიშნულის შესახებ GUARDIAN.GE-ის ლამბალოს საჯარო სკოლის დირექტორმა, დავით როსტომაშვილმა განუცხადა.

იგი საგარეჯოს მუნიციპალიტეტის სოფელ ლამბალოს საჯარო სკოლის დირექტორად 2012 წლის თებერვალში დაინიშნა და უკვე 8 წელზე მეტია რაც ორი – აზერბაიჯანული და ქართული სექტორისაგან შემდგარ სკოლას უდგას სათავეში.

როსტომაშვილის თქმით, სკოლა, რომელიც 2016 წელს აშენდა და რომლის მშენებლობა და რემონტი 4.5 მილიონი ლარი დაჯდა,1000 მოსწავლეზეა გათვლილი და იმის მიუხედავად, რომ სწავლის პროცესი ორ ცვლაში მიმდინარეობს, მაინც რთულდება სოციალური დისტანციის დაცვა, რადგან მოსწავლეთა რაოდენობა გათვლილ სტანდარტებზე გაცილებით მეტს, 1350-ს აღწევს.

იგი ლამბალოს საჯარო სკოლაში იმ დროს მივიდა, როცა სკოლა 5 კერძო სახლში იყო განთავსებული, აღნიშნული სახლები კი ერთმანეთისაგან საკმაოდ იყო მოშორებული და ასეთ მდგომარეობაში სასწავლო პროცესის ეფექტურად წარმართვა გარკვეულ სირთულეებს წარმოადგენდა.

„მე რომ მოვედი, ძალიან რთული მდგომარეობა დამხვდა. ლამბალოსა და მიმდებარე სოფლებში დაქირავებული გვქონდა 5 შენობა, სადაც მიმდინარეობდა სასწავლო პროცესი. უნდა ითქვას, რომ ეს შენობები ერთმანეთისაგან მოშორებით მდებარეობდა და თქვენ წარმოიდგინეთ, სკოლის ერთ-ერთი შენობა სხვა სოფელში, 5 კილომეტრის მანძილზეც კი მდებარეობდა. შეიძლება ითქვას, რომ სკოლა, თანამედროვე გაგებით, ფაქტობრივად არ არსებობდა.

„ასეთ პირობებში კი, ისე უნდა გაგენაწილებინა საათები მასწავლებლებისთვის, რომ მათ ერთი შენობიდან მეორე, დიდ მანძილზე დაშორებულ შენობაში არ ჰქონოდათ სასიარულო და გაკვეთილები ერთ სივრცეში ჩაეტარებინათ. შევძელით ის, რომ ყველა სახლში, სადაც განთავსებული იყო საკლასო ოთახები, ისე გვქონოდა ცხრილი გაკეთებული და პედაგოგებიც ისე შესაბამისად გვყოლოდა გადანაწილებული, კლასების მიხედვით, რომ ძალიან ბევრი სასიარულო არ ჰქონოდათ აქეთ-იქით“, უთხრა GUARDIAN.GE-ის დავით როსტომაშვილმა.

იგი არ გამორიცხავს, რომ ქვეყანაში კოვიდინფექციის მზარდი მაჩვენებლის პირობებში ლამბალოს საჯარო სკოლის ონლაინ სწავლებაზე გადასვლის საჭიროება დადგეს დღის წესრიგში.

„თუკი ასე მოხდება, ჩვენ უკვე გვაქვს ონლაინ სწავლების გამოცდილება და სწავლის პროცესი არ შეფერხდება. ასეთი რამ შეიძლება მაშინ დადგეს დღის წესრიგში თუკი სკოლაში ვირუსის შემთხვევა გამოვლინდება. დღემდე, საბედნიეროდ, ყველაფერი კარგად მიდის. რა თქმა უნდა, სწავლების ტრადიციული ფორმა უმჯობესი და უფრო ეფექტურია, მაგრამ როცა საქმე ადამიანების ჯანმრთელობას ეხება, მაშინ უპრიანია გაკვეთილების ჩატარების ისეთი ვარიანტი ავირჩიოთ, რომელიც უფრო მეტად არის უსაფრთხო და ასეთი ონლაინ სწავლებაა“, განუცხადა GUARDIAN.GE-ის დავით როსტომაშვილმა.