არსებობს უბნების გადათვლის მზაობა მიუხედავად იმისა, რომ თითოეულ ოქმს ხელს აწერს კომისიის ყველა წევრი, მათ შორის ოპოზიციიდან დანიშნული წევრები, - ასე უპასუხა მმართველი გუნდის წევრმა, ირაკლი კობახიძემ ჟურნალისტის კითხვას არასამთავრობო ორგანიზაციების ერთობლივ განცხადებასთან დაკავშირებით, სადაც აღნიშნულია, რომ საარჩევნო უბნების რვა პროცენტის შემთხვევაში, ხმის დათვლის ოქმებში არსებობდა გარკვეული დისბალანსი, რის გამოც უბნების შედეგების ხელახალ დათვლას ითხოვენ.

„რაც შეეხება გადათვლას, ამასთან დაკავშირებით ჩვენც გვქონდა კონსულტაციები და ზოგადად, არსებობს მზაობა ამ საკითხთან დაკავშირებით, რომ გარკვეული კრიტერიუმების საფუძველზე მოხდეს უბნების გადათვლა, მიუხედავად იმისა, რომ თითოეულ ოქმს ხელს აწერს ყველა კომისიის წევრი, მათ შორის ოპოზიციიდან დანიშნული კომისიის წევრებიც. ამის მიუხედავად, რამდენაც ვიცი, ცენტრალურ საარჩევნო კომისიასაც აქვს ამის მზაობა, შესაბამისად, ეს იქნება უზრუნველყოფილი“, – განაცხადა კობახიძემ.