ნავთობის ფასის შემცირებამ სერიოზული პრობლემები შეუქმნა აზერბაიჯანის ეკონომიკას. ამ და სხვა ფაქტორების გამო ხდება კაპიტალის გადინება ქვეყნიდან და საკმაოდ სწრაფი ტემპით მცირდება ცენტრალური ბანკის სავალუტო მარაგები. საერთაშორისო ვითარება და კონფრონტაცია რუსეთსა და დასავლეთს შორის, ირანის ნავთობის მოსალოდნელი გასვლა მსოფლიო ბაზარზე და მსოფლიოში ჭარბი ნავთობი არაფერ კარგს არ ჰპირდება აზერბაიჯანის ეკონომიკას, რომელიც უდიდეს წილად ეფუძნება ენერგომატარებლების ექსპორტიდან მიღებულ შემოსავლებს.


“2016 წელი ეკონომიკისთვის ადვილი წელი არ იქნება. ჩვენ ეს ვიცით და უნდა ვიცოდეთ”- განაცხადა დღეს აზერბაიჯანის პრეზიდენტმა ილჰამ ალიევმა, თუმცა საზოგადოება დაამშვიდა, რომ მომავალ წელსაც ქვეყნის წარმატებულ განვითარებას არანაირი პრობლემა არ შეექმნება – ყველა სოციალური პროგრამა განხორციელდება და ეკონომიკური განვითარება უზრუნველოფილი იქნება. ამის შესახებ აზერბაიჯანული მედია იტყობინება.


აღიარებს რა, რომ 2015 წელი აზერბაიჯანისათვის მძიმე წელი იყო, ალიევი ირწმუნება, რომ ყველა შეფასება სხვა ქვეყნებში არსებულ ვითარებასთან შედარებაში უნდა გაკეთდეს და თუკი სხვებთან, როგორც ეკონომიკური და პოლიტიკური, ისე სამხედრო და ზნეობრივი კრიზისი არსებობს, აზერბაიჯანში პირიქით, ეროვნული, ზნეობრივი ღირებულებები, აზერბაიჯანული ნაციონალიზმი და რელიგიური ტოლერანტობა არის დაცული, ხოლო სოცილურ-ეკონომიკური განვითარება უზრუნველყოფილი.


აზერბაიჯანის ფინანსთა მინისტრის სამირ შერიფოვის თქმით, ამჟამად აზერბაიჯანის ეკონომიკაზე ორი საგარეო შოკი ახდენს გავლენას. პირველი მათგანი მსოფლიო ბაზარზე ნავთობის ფასის მკვეთრი დაცემაა, ხოლო მეორე, რეგიონის ქვეყნების უმრავლესობაში ეროვნული ვალუტების საგრძნობი გაუფასურება.

tvfree.ge