მოსახლეობის სამპროცენტიანი ფენა ჩაგრავს 97 პროცენტს და ეუბნება, რომ არ არიან ამაყი, თავისუფალი და ხმის უფლების მქონე მოქალაქეები, – განაცხადა „ლეიბორისტული პარტიის“ ლიდერმა, შალვა ნათელაშვილმა დიპლომატებთან შეხვედრის დასრულების შემდეგ.

მისი თქმით, ოპოზიციის მოთხოვნა უცვლელია იმის თაობაზე, რომ ხელახალი არჩევნები უნდა დაინიშნოს.

„შეიძლება ითქვას, „ქართულ ოცნებას“ ჯერ არავითარი ინიციატივა არ აქვს, გარდა იმისა, რომ ბიძინა ივანიშვილი გამოგვიცხადონ უვადო, შეუზღუდავ მმართველად. ჩვენი პოზიცია რჩება უცვლელი იმის თაობაზე, რომ უნდა დაინიშნოს ახალი არჩევნები. სხვა გამოსავალი ქვეყანას არ აქვს, რადგან ძალაუფლება მოიპარეს, მიიტაცეს, წაართვეს ხალხს ქონებასთან ერთად, უფლებებთან ერთად, სამშობლოსთან ერთად და ეს ხელში ჩაიგდო მოსახლეობის სამპროცენტიანმა ფენამ, რომელიც ჩაგრავს 97 პროცენტს და ეუბნება, რომ თქვენ სამშობლოში ხართ არა ამაყი, თავისუფალი, ხმის უფლების მქონე მოქალაქეები, არამედ ხართ გერები, გინდათ იყავით აქ, გინდათ წადით სამუშოდ გერმანიაში.

წინა შეხვედრაზე ხმების გადათვლის თაობაზე იყო საუბარი, რასაც ჩვენ არ დავთანხმდით, მაგრამ მათ გუშინ შუაღამისას შეკრიბეს ცენტრალური საარჩევნო კომისია და შეაჯამეს ე.წ შედეგები, რამაც აზრი გამოაცალა გადათვლის პერსპექტივასაც კი“, – განაცხადა შალვა ნათელაშვილმა.

ნათელაშვილის თქმით, პარლამენტის თავმჯდომარე არჩილ თალაკვაძე ამ შეხვედრებზე ბიძინა ივანიშვილის დავალებებს აჟღერებს.

„თალაკვაძემ თქვა ის, რაც დააბარა ბიძინამ. ასე რომ, თალაკვაძე არაფერს არ ამბობს. აი, წერეთელმა დაგვიბარაო ხომ არის სიმღერა, ასეა ამ შემთხვევაშიც აქ.

ელჩები აგრძელებენ შუამავლობის პროცესს. ეს შუამავლობა არ არის ერთდღიანი ან ორდღიანი. ეს არის განგრძობადი პროცესი, რომელმაც შედეგთან უნდა მიგვიყვანოს“, – განაცხადა შალვა ნათელაშვილმა, რომლის სიტყვების ციტირებას საქართველოს პორველი არხი ავრცელებს.