პარტია „ქართული ოცნების“ საარჩევნო სიის მე-4 ნომრის, იუსტიციის ყოფილი მინისტრის, თეა წულუკიანის განცხადებით, ოპოზიციურ პარტიებს არ უნდათ ხმების გადათვლა და არჩევნები, მათ უნდოდათ რევოლუცია, რომელიც ჩაფლავდა.

„რევოლუცია ჩაფლავდა. მათ უყვართ ეს სიტყვა და მეც შემიყვარდა. ახლა, ამ ჩაფლავებული რევოლუციის ნანგრევებზე, ჩვენ ვხედავთ, რომ აღმოცენების პროცესშია პოლიტიკური ექსტრემიზმი“, აღნიშნა წულუკიანმა ტელეკომპანია „იმედის“ ეთერში.

მისი თქმით, ოპოზიციამ არჩევნებზე მიიღო ის ხმები, რაც რეალურად უწერიათ და მათ მიერ მიღებული ხმები პარალელური დათვლის შედეგებს ემთხვევა.

„პარალელური დათვლა ჩაატარა არა ცესკო-მ, არამედ ISFED-მა (სამართლიანი არჩევნებისა და დემოკრატიის საერთაშორისო საზოგადოებამ). ISFED-ზე მთავარი ოპოზიციური ძალის თავმჯდომარე ამბობს, რომ ამ არასამთავრობო ორგანიზაციას ენდობიან. შესაბამისად, რატომ არ ენდობიან იმას, რომ ცესკო-ს მაჩვენებელი და ISFED-ის მაჩვენებელი „ქართული ოცნებისთვის“ პრაქტიკულად ერთი და იგივეა, თუ არ ჩავთვლით 0,1%-იან სხვაობას“, განაცხადა წულუკიანმა.