ის ფაქტი, რომ სახელმწიფო მდივანი არ შეხვდა იმ ოპოზიციას, რომელიც რუსული საქმით არის დაკავებული, ეს არის ძალიან მნიშვნელოვანი, - განაცხადა „ქართული ოცნების“ აღმასრულებელმა მდივნმა ირაკლი კობახიძემ.

მისი თქმით, მმართველი გუნდი ამ ფაქტზე სპეკულაციას არ აპირებს, თუმცა ის საკმაოდ ნიშანდობლივია.

„საქართველოში არ არის იმ პოლიტიკური პარტიების ადგილი, რომლებიც რუსულ საქმეს აკეთებენ და ასეთი პარტიების ადგილი არ არის ამერიკის შეერთებული შტატების სახელმწიფო მდივანთან. რა თქმა უნდა, ყველას ერთ ქვაბში არ ვხარშავ, მაგრამ როდესაც საუბარია მთავარ ოპოზიციურ პარტიებზე, ისინი რუსულ საქმეს აკეთებდნენ დიდი ხნის განმავლობაში, ჯერ როცა იყვნენ ხელისუფლებაში და ახლა, როცა არიან უკვე ოპოზიციაში. აქედან გამომდინარე, ის, რომ ამერიკის შეერთებული შტატების სახელმწიფო მდივანს ეს პარტიები ხვდებიან პროტესტით, ეს არის ძალიან ნიშანდობლივი, მნიშვნელოვანი და საინტერესო მოვლენა. ეს კიდევ ერთხელ ადასტურებს იმას, რომ ეს პარტიები არიან და მომავალშიც იქნებიან რუსული საქმით დაკავებული“, - აღნიშნა კობახიძემ.