წერეთლის გამზირზე,„ემ ბი სის“ შენობაში ცხრა მძევალი და ერთი შეიარაღებული პირი იმყოფება, – აღნიშნული განცხადება საპატრულო პოლიციის სამსახურის უფროსმა, ვაჟა სირაძემ გააკეთა.

„წერეთლის გამზირზე მოხდა შეიარაღებული თავდასხმა ერთ-ერთ მიკროსაფინანსო ორგანიზაციაზე. ადგილზე იმყოფებიან პოლიციური ჯგუფები. ჩვენ ხელთ არსებული ინფორმაციით, მიკროსაფინანსო ორგანიზაციაში არის ცხრა მძევალი და ერთი შეიარაღებული პირი. გამოძიება დაწყებულია ყაჩაღობისა და ცეცხლსასროლი იარაღის უკანონო ტარების ფაქტზე. რაც შეეხება შეიარაღებას, ამ ეტაპისთვის დაზუსტებულ ინფორმაციას ვერ მოგახსენებთ“, – განაცხადა ვაჟა სირაძემ.

საპატრულო პოლიციის უფროსმა მედიასაშუალებებს მოუწოდა, შეწყვიტონ ადგილზე არსებული ვითარების პირდაპირ ეთერში ჩვენება.

„ასევე მინდა გთხოვოთ და მოგიწოდოთ მედიასაშუალებებს, პირდაპირი ეთერებით ჩართვა შეწყვიტოთ, ვინაიდან ეს საფრთხეს უქმნის როგორც მოქალაქეების, ასევე სამართალდამცავი ორგანოების წარმომადგენლების სიცოცხლეს. რაც შეეხება მოთხოვნებს და ყველა დეტალურ ინფორმაციას, ეტაპობრივად მოგაწვდით. ამ ეტაპისთვის მიმდინარეობს ღონისძიება, შესაბამისად, ძალიან გთხოვთ, ლაივ ჩართვები არ გავაკეთოთ და ინფორმაცია, რომელიც არ არის დაზუსტებული, არ გავავრცელოთ“, – განაცხადა ვაჟა სირაძემ.