ანალიტიკოს არჩილ გამზარდიას განცხადებით, „ნაციონალებს“ ქუჩაში ხალხის გამოყვანის იმედი აქვთ, რადგან ქვეყანაში ეკონომიურად მძიმე ვითარებაა, ლარიც გაუფასურდა და ისინი ფიქრობენ, იქნებ ხალხი ხელისუფლების წინააღმდეგ გამოვიდეს და შემდეგ ეს სათავისოდ გამოიყენონ.


როგორც გამზარდიამ გაზეთ „ახალ თაობასთან“ საუბარში განაცხადა, „ნაციონალური მოძრაობა“ ხვდება, რომ არჩევნების გზით ხელისუფლებაში მოსვლის პატარა შანსი აქვთ და პარლამენტშიც უფრო მცირე წარმომადგენლობით მოხვდებიან, ვიდრე დღეს არიან.


„მათ საზოგადოების აყოლიება ძალიან გაუჭირდებათ. შესაძლოა, ერთი-ორი ოპოზიციური პარტიის აყოლიება შეძლონ.


ამ კონტექსტში რაც შეეხება ალასანიას, მისი შემთხვევა სპეციფიურია. ბატონი ირაკლი როდესაც ხელისუფლებიდან წავიდა თუ გაუშვეს, „თავისუფალ დემოკრატებს“ ჰქონდათ ყველა პირობა, რომ მესამე ძალად ქცეულიყვნენ, რომლებიც პირველ ეტაპზე გადაფარავდნენ „ნაციონალურ მოძრაობას“ - აცხადებს გამზარდია და დასძენს, რომ ალასანიას მთავარი კოზირი დასავლურობა იყო, მაგრამ „რესპუბლიკური პარტიის“ კიდევ უფრო დაახლოებამ „ოცნებასთან“ და ხელისუფლებაში გააქტიურებამ, ალასანიას ეს განსაკუთრებული ნიშა წაართვა.


„დღეის მოცემულობით, ალასანიას პარტიის შანსები მინიმალურია. შესაძლოა, მათ ბარიერიც კი ვერ გადალახონ“, - ამბობს ანალიტიკოსი და მიიჩნევს, რომ „თავისუფალ დემოკრატებს“ ერთადერთი შანსი რჩებათ, - ეგებ „ნაციონალურ მოძრაობასთან“ ერთად როგორღაც პარლამენტში შეღწევა მოახერხონ.


„თუ ეს ვითარება არ იქნება, მაშინ ირაკლი ალასანიას ნამდვილად არაფერში სჭირდება „ნაციონალურ მოძრაობასთან“ ერთად ყოფნა“ - აცხადებს ანალიტიკოსი და მიიჩნევს, რომ „ნაციონალებთან“ ალიანსი ალასანიასთვის პოლიტიკური თვითმკვლელობის ტოლფასი იქნება.


„ნაციონალური მოძრაობა“ პრაქტიკულად უკუგდებული იყო, როგორც საზოგადოების, ისე ყველა პოლიტიკური პარტიისაგან, გარდა მისი სატელიტი პარტიებისა. ამიტომ სხვა პარტიებთან თანამშრომლობა „ნაციონალებს“ მეტ ძალას მისცემს. თუმცა ოპოზიცია მკვეთრ შეცდომას დაუშვებს, თუ „ნაციონალურ მოძრაობას“ დაუკავშირდება. „ნაცმოძრაობა“ არ არის სანდო პარტნიორი და ეს პოლიტიკურ პარტიებს კარგად უნდა ახსოვდეთ. ხოლო თუ საჭირო გახდა, „ნაცები“ მათ დაპატიმრებასაც არ მოერიდებიან და ეს ერთხელ უკვე გააკეთეს. თუ ოპოზიციას სურს შანსები გაეზარდოს, მან პოლიტიკური ბაზრიდან „ნაციონალების“ ჩამოშორება უნდა უზრუნველყოს“ - აცხადებს გამზარდია და დასძენს, რომ თუ ყველა პოლიტიკური ძალა ერთად მოახერხებს „ნაციონალური მოძრაობის“ ჩამოშორებას, ყველა მათგანს „ქართული ოცნების“ დამარცხების ბევრად მეტი შანსი გაუჩნდება, რადგან „ოცნებას“ დაბალი რეიტინგი აქვს და მას მხოლოდ „ნაციონალური მოძრაობის“ ფონზე შეუძლია წარმატების მიღწევა“.



newspress.ge