ფოტო: საქართველოს კალათბურთის ეროვნული ფედერაციის Facebook-ის გვერდიდან

ევრობასკეტ 2022-ის შესარჩევ ეტაპზე საქართველოს კალათბურთის ეროვნულმა ნაკრებმა ფინეთი 6 ქულით, 91:85 დაამარცხა.

როგორც „მთავარი არხი“ იტყობინება, თავდაპირველად, საქართველოს ნაკრები მდევრის პოზიციაში იყო, მაგრამ მალევე, ზუსტი ტყორცნებით შეძლო თამაშში გარდატეხის შეტანა, რამაც, საბოლოო ჯამში, ნაკრებს მნიშვნელოვანი გამარჯვება მოუტანა.

შეხვედრის საუკეთესო კალათბურთელად გიორგი შერმადინი დასახელდა, რომელმაც ნაკრებს 27 ქულა შესძინა.

შეხვედრა ფინეთში, ესპოოს „მეტრო არენაზე“ გაიმართა.

ევრობასკეტი 2022-ის შესარჩევ ეტაპზე ფინეთთან სტუმრად 91:85 გამარჯვების შემდეგ საქართველოს ნაკრების კაპიტნის, თორნიკე შენგელიას კომენტარი ასეთი იყო:

„კარგად მოგეხსენებათ, უმნიშვნელოვანესი თამაში იყო ჩვენთვის, ვიცოდით, რომ მთელი საქართველო ელოდა ამ შეხვედრას. რთულ პერიოდში ვართ, კორონავირუსის გამო დიდი შეფერხებებია, ასეთ დროს კი ხალხის გულების გახარება ჩვენთვის ბევრს ნიშნავს.

ვამაყობ ჩემი გუნდით, ექიმიდან დაწყებული ნაკრების ნაკრების თითოეული წევრით დამთავრებული.“

თორნიკეს ფინელებმა პრესკონფერენციისას საკუთარი სტატისტიკა შეახსენეს: 19 ქულა, 8 მოხსნა, 4 პასი.

„და 7 შეცდომა. ჩემთვის მთავარი არა საკუთარი მონაგარი, არამედ გუნდის გამარჯვებაა. კიდევ გავიმეორებ – ძალიან ვამაყობ ჩემი თანაგუნდელებით“, თქვა თორნიკე შენგელიამ, რომლის სიტყვების ციტირებასაც საქართველოს პირველი არხი ავრცელებს.