საქართველოს პარლამენტის წინ დედაქალაქის მთავარი ნაძვის ხის ანთების ცერემონია გაიმართა. ნაძვის ხე თბილისის მერმა აანთო.
ღონისძიების მსვლელობისას კახა კალაძემ თანამოქალაქეებს პირდაპირი ეთერით მიმართა და აღნიშნა, რომ პადემიით გამოწვეული შეზღუდვების გათვალისწინებით, წელს, წინასაახალწლო და საახალწლო ღონისძიებების ფორმატი განსხვავებულია, რათა შემცირდეს ვირუსის გავრცელების რისკი და დაცული იყოს მოქალაქეთა ჯანმრთელობა.
მისივე თქმით, დედაქალაქის წლევანდელი სლოგანია "თბილისი - სოლიდარობის ქალაქი".
"მოგესალმებით ყველაზე თბილი და ლამაზი ქალაქის მცხოვრებლებს, მივესალმები სრულიად საქართველოს, ჩვენს სტუმრებს, ჩვენს საყვარელ ემიგრანტებს, რომლებიც მსოფლიოს სხვადასხვა ქვეყნიდან გვადევნებთ თვალს.
განსაკუთრებით მინდა მივესალმო ჩვენს შვილებს, ჩვენს პატარებს. სწორედ თქვენი ჟრიამული, თქვენი სიხარულით სავსე თვალები არის ის სასწაული, რომელიც ნებისმიერ დღეს აქცევს დღესასწაულად. მინდა, ბოდიში მოგიხადოთ, რომ ახლა აქ არ ხართ, მაგრამ დღეს ასეა საჭირო, რათა გავუფრთხილდეთ ერთმანეთის ჯანმრთელობის უსაფრთხოებას და ერთმანეთის სიცოცხლეს.
ჩემო პატარებო, ალბათ იცით ამბავი ძალიან ლამაზ და მამაც გოგონაზე, რომელმაც სძლია უდიდეს ბოროტებას და პატარების მფარველად იქცა. დღეს ბარბარობაა და მინდა მოგილოცოთ, მივულოცო მთელ საქართველოს. ჩემო პატარა მეგობრებო, გჯეროდეთ, არ არსებობს ბოროტება, რომლის დაძლევასაც ვერ შევძლებთ სიყვარულით, ერთმანეთის თანადგომით და სოლიდარობით.
პირველად ცხოვრებაში და იმედი მაქვს, ერთადერთხელ, ნაძვის ხის ანთების ღონისძიება ომის გამოცხადებით უნდა დავიწყო.
დიახ, არ მოგესმათ - ჩვენ, ყველამ ერთად ომი უნდა გამოვუცხადოთ პანდემიას და ამ საზიზღარ ვირუსს. იცოდეს, რომ არ გვეშინია, არასდროს დავნებდებით.
ეს საახალწლო განათებები, ეს ნაძვის ხის ანთების ტრადიციული რიტუალი არის არა მარტო ზეიმის, ახალი წლის, ახალი იმედების ტრადიციული აღნიშვნა, არამედ გამოწვევა, არშეგუება იმ რეალობასთან, რაც ამ ვირუსმა მოგვიწყო.
წელს თბილისს ვაცხადებთ სოლიდარობის ქალაქად, ვინაიდან, მხოლოდ ერთმანეთის გვერდში დგომა, დახმარება, ნუგეშისცემა გადაგვალახინებს იმ დაბრკოლებებს და სტრესს, რაც პანდემიის პირობებში გვაქვს ქვეყანაში.
გახსოვდეთ, რომ კარგი განწყობა, მხიარულება და ბავშვების კისკისი, ჟრიამული - ეს არის ის, რისიც ეშინია ვირუსს.
სიცოცხლე გრძელდება მეგობრებო,
სიცოცხლე მშვენიერია!
ახალი წელი მოიტანს ახალ იმედს და ჯანმრთელ მომავალს!
მოდი, ავანთოთ ქვეყნის მთავარი ნაძვის ხე იმ იმედით, რწმენით, რომ 2021 წელი იქნება გამარჯვებების, მშვიდობის, ბედნიერებისა და კეთილდღეობის წელი", - განაცხადა თბილისის მერმა.
ღონისძიება, პანდემიით გამოწვეული შეზღუდვებიდან გამომდინარე, ონლაინ ფორმატში მიმდინარეობდა და ხანმოკლე იყო. ღონისძიება მუსიკალურად გააფორმა ჯგუფმა - Quintenssence.
მოგესალმებათ საინფორმაციო სააგენტო GUARDIANGE-ის ადმინისტრაცია და გაცნობებთ, რომ სააგენტოს განახლების შედეგად, ამიერიდან ვებგვერდის ძველ ვერსიაზე -WWW.GUARDIAN.GE ხელმისაწვდომი იქნება 2023 წლის 7 სექტემბრამდე განთავსებული საინფორმაციო ხასიათის წერილობითი/ფოტო/ვიდეო მასალა, ხოლო განახლებული სააგენტოს ვებგვერდს შეგიძლიათ გაეცნოთ WWW.GUARDIANGE.COM-ზე.
ამერიკის შეერთებული შტატების არჩეულმა პრეზიდენტმა დონალდ ტრამპმა ჯანდაცვისა და სოციალური მომსახურების მდივნად ვაქცინაციის მიმართ სკეპტიკურად განწყობილი რობერტ ფიცჯერალდ კენედი უმცროსი, პრეზიდენტ ჯონ კენედის ძმისშვილი დაასახელა, რითაც დაასრულა დიდი ხნის მითქმა-მოთქმა კენედის გარშემო იმის შესახებ, თუ რა თანამდებობას დაიკავებდა იგი ტრამპის ადმინისტრაციაში.