რეგიონული განვითარებისა და ინფრასტრუქტურის სამინისტროს პანდემიის გამო მოუწია გეგმების გადახედვა და გარკვეული პროექტების დროში გადანაწილება, თუმცა დიდი ინფრასტრუქტურული პროექტები, შეზღუდვების პირველი მკაცრი ტალღის შემთხვევაშიც კი არ გაგვიჩერებია, – განაცხადა რეგიონული განვითარებისა და ინფრასტრუქტურის მინისტრობის კანდიდატმა, მაია ცქიტიშვილმა პარლამენტის საკომიტეტო მოსმენაზე.

მისი თქმით, იყო გარკვეული შეფერხებები, მათ შორის რიკოთის საუღელტეხილო მონაკვეთზე, სადაც მუშაობენ ჩინური კომპანიები და გადაადგილების შეზღუდვის გამო ფიზიკურად ვერ მოახერხეს დადგენილ ვადებში თვისი თანამშრომლების მობილიზება.

„როდესაც რიკოთის მონაკვეთზე ვსაუბრობთ, ჩვენ სამწუხაროდ, მოგვიწევს პროექტების გადავადება. რა თქმა უნდა, მაქსიმალურად ვცდილობთ კონტრაქტორებთან და ზედამხედველ კონსულტანტებთან ერთად პროექტების ვადების შემჭიდროებას. სავარაუდოდ, რაც იყო დაგეგმილი 2021 წლისთვის, ის 2022 წლისთვის გადავა და 2023 წელი იქნება ის რეალისტური ვადა, რომელსაც უნდა ველოდოთ ასეთი დიდი პროექტების დასრულების პროცესში. საერთაშორისო პროექტებზე მუდმივი ტესტირება მიმდინარეობს, დაახლოებით 180 ინფიცირების შემთხვევა არის გამოვლენილი და შესაბამისად სხვადასხვა დროს სხვადასხვა რაოდენობის ადამიანები არიან მოქცეულები კარანტინში. ამჟამად 1000-ზე მეტი მუშა არის, როგორც უცხოელ, ასევე ადგილობრივიც კარანტინში. ეს არის გამოწვევები, რომელშიც ჩვენ ყველანი, მთელი ქვეყანა ვიმყოფებით. შესაბამისად ერთობლივად ვცდილობთ, რომ ამ გამოწვევებს გავუმკლავდეთ. მთლიანობაში მნიშვნელოვანია იმის აღნიშვნა, რომ ამ ეტაპზე პანდემიის გამო არც ერთი პროექტი არ არის გაჩერებული, არც მასობრივი ინფიცირების შემთხვევები არ არის ისეთი, რომ პროექტები გაგვეჩერებინა, მაგრამ, რა თქმა უნდა, შესრულების ვადებზე ჩვენ გვექნება გავლენა”, – განაცხადა მაია ცქიტიშვილმა.