ქართული მხრიდან დახმარებას არ განვიხილავთ, – განაცხადა ოკუპირებული აფხაზეთის ე.წ. უშიშროების საბჭოს მდივანმა, სერგეი შამბამ საქართველოს პირველ არხთან სატელეფონო საუბრისას.

მისი თქმით, ხანძრის შედეგად წარმოქმნილ მდგომარეობას თავად უმკლავდებიან.

„იყო შემთხვევები, როცა რუსული ვერტმფრენები მთიან რეგიონში ხანძრის ჩაქრობაში დაგვეხმარნენ. ასეთი აუცილებლობის შემთხვევაში, ჩვენ უფრო რუსულ მხარეს მივმართავთ“, – აცხადებს სერგეი შამბა.

ოკუპირებული აფხაზეთის ე.წ. უშიშროების საბჭოს მდივანმა გაგრაში შექმნილ ვითარებაზეც გააკეთა კომენტარი. მისი თქმით, ადგილზე ყველანაირი ზომები მიღებულია და ხანძრის ახალი კერები ძირითადად მთიან ნაწილში ჩნდება.

„არსებობს გარანტია, რომ მოსახლეობა და მათი საცხოვრებელი ადგილები არ დაზარალდება. ჩვენი საგანგებო სიტუაციების სამინისტრო სიტუაციას აკონტროლებს და დარწმუნებული არიან, რომ იქ არანაირი პრობლემა არ იქნება“, – განაცხადა სერგეი შამბამ.

შერიგებისა და სამოქალაქო თანასწორობის საკითხებში სახელმწიფო მინისტრმა თეა ახვლედიანმა განაცხადა, რომ საქართველოს ცენტრალური ხელისუფლება აფხაზეთის დე-ფაქტო ხელისუფლებასთან ინტენსიურ კავშირშია და სთავაზობს დახმარებას ხანძრების საწინააღმდეგო სამუშაოებში.