ამბროლაურის აეროპორტს დღეს ოთხი წელი შეუსრულდა. პირველი რეისი ნატახტარიდან რაჭის მიმართულებით 2017 წლის 14 იანვარს შესრულდა  გახსნის დღიდან დღემდე ამბროლაურის აეროპორტი 6 100-ზე მეტ მგზავრს მოემსახურა, – ინფორმაციას საქართველოს აეროპორტების გაერთიანება ავრცელებს.

მათივე ცნობით, ფრენების დაწყებამდე თბილისიდან ამბროლაურის მიმართულებით მიკროავტობუსები მოძრაობდნენ. მანძილი 270 კილომეტრია და მის დაფარვას დაახლოებით  საათი სჭირდებოდა. აეროპორტის მშენებლობის შემდეგ მგზავრობის ხანგრძლივობა ნატახტარიდან ამბროლაურის მიმართულებით 35 წუთამდე შემცირდა. შესაბამისად, რაჭა როგორც ადგილობრივი, ისე უცხოელი ვიზიტორებისთვის გაცილებით ხელმისაწვდომი გახდა.

საქართველოს აეროპორტების გაერთიანების დირექტორის, თამარ არჩუაძის განცხადებით, აეროპორტის არსებობა მნიშვნელოვანია რაჭა-ლეჩხუმისა და ქვემო სვანეთის მხარისთვის, განსაკუთრებით, ადგილობრივი ტურისტული სექტორისთვის, რადგან ამბროლაურის აეროპორტმა რეგიონის მოსახლეობისთვის ახალი შესაძლებლობები შექმნა.

,,ადგილობრივი მნიშვნელობის აეროპორტის არსებობით რაჭაში ეკონომიკური აქტივობა გაიზარდა. გაჩნდა ახალი სასტუმროები, გესთჰაუსები, შესაბამისად, დამატებითი სამუშო ადგილები, რამაც მეტწილად ხელი შეუწყო რეგიონში ტურიზმის სფეროს განვითარებას. აეროპორტში ჯამში, ამ ეტაპზე 55 ადამიანია დასაქმებული. მინდა, თითოეულ მათგანს მივულოცო დღევანდელი დღე და მადლობა გადავუხადო განსაკუთრებით რთულ პანდემიურ პერიოდში დაუღალავი შრომისთვის. აეროპორტს კი 2021 წელს მეტი რეისისა და მგზავრის მიღება ვუსურვო“, – განაცხადა თამარ არჩუაძემ.