წალკის მუნიციპალიტეტის სოფელ აშკალის სომხურენოვან საჯარო სკოლაში 2020-2021 სასწავლო წლის მეორე სემესტრი საკლასო ოთახებში ორშაბათს, 18 იანვარს განახლდა და სწავლის პროცესი განათლების, მეცნიერების, კულტურისა და სპორტის და ჯანდაცვის სამინისტრების რეკომენდაციების სრული დაცვით მიმდინარეობს.

აღნიშნულის შესახებ GUARDIAN.GE-ის სკოლის დირექტორმა, ვაჟა ზურნაჩიანმა განუცხადა.

„ჩვენ, ამ რთულ ეპიდემიოლოგიურ პერიოდში, მოვახერხეთ ის, რომ 2020-21 სასწავლო წელი ძირითადად საკლასო ოთახებში მოგვეცვა. გასული წლის სექტემბერში კლასებში დაწყებული პროცესი, მხოლოდ დეკემბრის მეორე ნახევარში 2 კვირით იქნა შეწყვეტილი, რადგან სკოლის რამდენიმე პედაგოგს კორონავირუსი დაუდასტურდა და დროებით ონლაინ სწავლებაზე გადავედით. თუმცა, უნდა ითქვას, რომ ეს მხოლოდ 2-კვირიანი პერიოდი იყო, რასაც შემდეგ ზამთრის არდადეგები მოჰყვა და სკოლები ისედაც ისვენებდნენ.

(GUARDIAN.GE-ის ფოტოზე: წალკის მუნიციპალიტეტის სოფელ აშკალის სომხურენოვან საჯარო სკოლის დირექტორი ვაჟა ზურნაჩიანი

„18 იანვარს, განათლებისა და ჯანდაცვის სამინისტროების რეკომენდაციების სრული დაცვით განვაახლეთ მეორე სემესტრი. სკოლაში, სათანადო ადგილებში განთავსებული გვაქვს დეზობარიერები, გამართულად მუშაობს 2020 წლის სექტემბერში მაღალ დონეზე გაკეთებული სველი წერტილები, რომელიც სკოლის შენობის შიგნით გვაქვს განთავსებული. აღჭურვილი ვართ პირბადეებით. მაქსიმალურად ვიცავთ ყველა წესს და იმედს ვიტოვებთ, რომ მეორე სემესტრს საკლასო ოთახებში დავასრულებთ“, უთხრა GUARDIAN.GE-ის აშკალის საჯარო სკოლის დირექტორმა, ვაჟა ზურნაჩიანმა.