საქართველოს პრემიერ-მინისტრმა გიორგი გახარიამ, ჟენევის საერთაშორისო მოლაპარაკებების თანათავმჯდომარესთან, სამხრეთ კავკასიასა და საქართველოში კრიზისის საკითხებში ევროკავშირის სპეციალურ წარმომადგენელ ტოივო კლაართან შეხვედრაზე, რეგიონში ბოლო პერიოდში უსაფრთხოების კუთხით მომხდარ ცვლილებებსა და არსებულ გამოწვევებზე ისაუბრა.
მთავრობის მეთაურმა აღნიშნა, რომ რეგიონში მომხდარი ცვლილებები ოკუპირებულ ტერიტორიებზე არსებულ გამოწვევებს კიდევ უფრო ამძაფრებს, რაც საქართველოს მთავრობის მხრიდან ოკუპირებული ტერიტორიების მიმართულებით ეფექტიანი, ერთიანი სამთავრობო ხედვის და პოლიტიკის კოორდინაციის განხორციელებას კიდევ უფრო დიდ მნიშვნელობას ანიჭებს.
შეხვედრაზე ყურადღება დაეთმო 2008 წლის რუსეთ-საქართველოს ომის საქმეზე სტრასბურგის ადამიანის უფლებათა ევროპული სასამართლოს ისტორიული გადაწყვეტილების მნიშვნელობას და სამომავლოდ, ქვეყნის დეოკუპაციის პროცესში მისი გამოყენების აუცილებლობას.
საუბარი ასევე შეეხო ოკუპირებულ რეგიონებსა და მათ მიმდებარე ტერიტორიებზე უსაფრთხოების გარემოს და რუსეთის საოკუპაციო რეჟიმის მხრიდან გადაადგილების თავისუფლების შეზღუდვის შედეგად შექმნილ ჰუმანიტარულ პრობლემებს, ასევე ინციდენტების პრევენციისა და მათზე რეაგირების მექანიზმის შეხვედრების, ისევე როგორც ჟენევის საერთაშორისო დისკუსიების პლატფორმების გააქტიურების აუცილებლობას და იმ გამოწვევებს, რომელიც ამ კუთხით არსებობს.
პრემიერის შეფასებით, ოკუპირებული ტერიტორიების კუთხით არსებული გამოწვევები ეროვნული უსაფრთხოების დონის პრობლემაა, რის გადაჭრაშიც საქართველოს მთავრობის ერთიანი, კოორდინირებული პოლიტიკის განხორციელებასთან ერთად, უდიდესი მნიშვნელობა ენიჭება ევროკავშირისა და სხვა სტრატეგიული პარტნიორების გააქტიურებას და პირდაპირ ჩართულობას.
გიორგი გახარიამ ტოივო კლაარს კონფლიქტის მშვიდობიანი დარეგულირების პროცესში ევროკავშირის ჩართულობისა და საოკუპაციო ხაზის მიმდებარე ტერიტორიებზე ევროკავშირის მონიტორინგის მისიის მიერ ობიექტური საერთაშორისო მონიტორინგის განხორციელებისთვის მადლობა გადაუხადა.
ინფორმაციას მთავრობის ადმინისტრაციის პრესსამსახური ავრცელებს.
მოგესალმებათ საინფორმაციო სააგენტო GUARDIANGE-ის ადმინისტრაცია და გაცნობებთ, რომ სააგენტოს განახლების შედეგად, ამიერიდან ვებგვერდის ძველ ვერსიაზე -WWW.GUARDIAN.GE ხელმისაწვდომი იქნება 2023 წლის 7 სექტემბრამდე განთავსებული საინფორმაციო ხასიათის წერილობითი/ფოტო/ვიდეო მასალა, ხოლო განახლებული სააგენტოს ვებგვერდს შეგიძლიათ გაეცნოთ WWW.GUARDIANGE.COM-ზე.
ამერიკის შეერთებული შტატების არჩეულმა პრეზიდენტმა დონალდ ტრამპმა ჯანდაცვისა და სოციალური მომსახურების მდივნად ვაქცინაციის მიმართ სკეპტიკურად განწყობილი რობერტ ფიცჯერალდ კენედი უმცროსი, პრეზიდენტ ჯონ კენედის ძმისშვილი დაასახელა, რითაც დაასრულა დიდი ხნის მითქმა-მოთქმა კენედის გარშემო იმის შესახებ, თუ რა თანამდებობას დაიკავებდა იგი ტრამპის ადმინისტრაციაში.